Баку луиз матынгес

Документ вылэ гожтӥськизы Азербайджанысь Прессая советлэн кивалтӥсез Афлатун Амашов но Удмуртиысь Журналистъёслэн огазеяськонзылэн тӧроез Елена Капитоненко.

Пумиськонэ озьы ик пыриськизы Удмуртиысь Печатья но ивор вӧлмытонъя агентстволэн кивалтӥселэн воштӥсез Назиля Абашева, Нациосын ужан политикая министрлэн воштӥсез Нелли Мамаева, Удмуртиысь азербайджанъёслэн «Достлуг» огазеяськонлэн кивалтӥсьёсыз, редакторъёс но журналистъёс.

Назиля Абашева сьӧрлось куноослы мадиз асьме элькунысь ивор вӧлмытон ёзъёслэн мукет улосёсын но кунъёсын кусыпъёс воземзы, конкурсъёсы пыриськемзы, грантъёсын ужамзы сярысь. Шуиз, Удмуртиысь журналистъёс дась Азербайджанысь эшъёсынызы но кусып тупатыны, та калык сярысь асьме лыдӟисьёслы мадьыны.

Елена Капитоненко тодматӥз Журналистъёслэн огазеяськонзылэн уженыз. Пусйыны кулэ, ӵапак Елена Рудольфовна нырысь кусып тупатӥз Азербайджанысь журналистъёслэн кивалтӥсьёсынызы — Бакуе шутэтскыны ветлон сяменыз со юромо отысь огазеяськонлэн уженыз тодматскыны пыраз. Азербайджан делегацилэн кивалтӥсез Иса Акпер-Оглы Габиббейли, Азербайджанысь Наукаосъя академилэн вице-президентэз, Национальной Меджлислэн депутатэз пусйиз:

— Мон туж оскисько, таӵе пумиськонъёс бере кусыпъёсмы юнмалозы. Нырысь ик ми малпаськом валче ужаны наука но творчество удысын. Умой луысал валче семинаръёс, конференциос, конкурсъёс ортчытъяны, книгаос но пособиос поттыны. Оскисько, Удмуртиысь журналистъёс матысь дыре ик быгатозы Бакуе вуылыны, милям калыкенымы но культураенымы, улэм-вылэменымы тодматскыны, нош милям иворчиосмы — тӥлесьтыд шаердэс учкыны.