Бадӟым удмурт диктантэз очно амалэн гожъясьёс куспын йылпумъянъёс лэсьтэмын

    Ужрадлэн валтӥсь малпанэз – удмурт кылын шонер, чебер но вольыт гожъяськонлы саклык висъян. Туэ «БУД». кык амалэн радъяськиз – «очно» амалэн Удмурт Кун Университетын, «заочно» амалэн «Мынам Удмуртие» радиолэн меӵак эфираз

    Азьвыл аръёсын ӵошатыса, туэ диктантэз калык уродгес гожтӥз. Очной амалэн гожтӥсьё пӧлын тужгес трос баллъёс люказ «Удмурт дунне» газетлэн редакторез Зинаида Рябинина – 94 балл. Кылем арын тужгес визьмоез луиз вал Рябина Лена, диктантэз 98 баллы гожтӥз. Нош валля арын Удмурт кун университетысь профессор Валей Кельмаков текстэз 100 баллы гожтӥз.

    Кызьы вера «Удмурт дунне» газетлэн ответственной секретарез Ольга Вахитова, туэ текстлэн секытэз пунктуация бордын вал. Ӵем пумиськылӥзы авторской пусъёс, со вакытэ ик воксё но ӧй вал деепричастной оборотъёс.

    Али диктантэз эскерисьёс эскеро радио пыр гожтэм текстъёсты. Йылпумъянъёс лэсьтэмын луозы 11-тӥ куратолэзе.