Бадӟым удмурт диктантэз 2022-тӥ арын гожтӥз 3 сюрс пала адями

2-тӥ оштолэзе Удмуртиын но солэн палэназ дас одӥгетӥзэ ини «Бадӟым удмурт диктант» акция ортчиз. Туэ со Удмуртиын ялэм Дышетонлэн арезлы сӥземын вал. Диктантлэсь текстсэ гожтӥз «Кенеш» журналлэн валтӥсь редакторез Анастасия Шумилова.

Диктантэз туэ гожтыны луиз «Мынам Удмуртие» радиолэн но телевидениелэн меӵак эфирез улсын, озьы ик каръёсын но ёросъёсын усьтэм площадкаосын. Удмуртиын сыӵе площадкаос ужазы 125 интыын, со сяна 30 площадкаос усьтэмын на вал мукет улосъёсын но.

Радъясьёслэн верамзыя, Удмуртиын сяна, удмурт диктант гожтӥзы Москваын, Санкт-Петербургын, Муромын, Башкортостанын, Татарстанын но Марий Элын.

Акцие оглом 2 943 мурт пыриськиз. Со пӧлысь 700 котырез – текстэз радио пыр лыдӟем улсын гожтӥз. «Бадӟым удмурт диктант» ужрадэ пыриськисьёс пӧлын тужгес пиналъёсыз Ижкарысь, Башкортостанысь но Татарстанысь 7 аресъем вить пиналъёс луизы. Нош тужгес арлыдоосыз – Балезино ёросысь 85 аресъем кык нылкышноос. Ваньмызлэсь трос диктант гожтӥсьёс — Дэри ёросын улӥсьёс.

Диктант гожтӥсьёслэсь ужъёссэс Удмурт кун университетысь Удмурт кылосбуръя, финно-угроведениея но журналистикая институтысь дышетӥсьёс учкизы. Озьыен, диктантэз янгышъёстэк гожтӥз но 100 балл люказ 92 адями.

Бадӟым удмурт диктантэ пыриськемъёс асьсэлэсь баллъёссэс тодыны но электрон сертификат басьтыны быгатозы 16-тӥ куартолэзьысен та чӧлскетъя — udmdiktant.ru