«Бадӟым удмурт диктант» туэ ортчоз 8-тӥ оштолэзе

Котькуд аре сямен ик диктантэз «Мынам Удмуртие» радиолэн меӵак эфираз лыдӟозы. Ужъёсты эскерозы Удмурт кун университетысь дышетӥсьёс, котькуд гожтэтэз дунъялозы но йылпумъянъёссэ шараялозы «Мынам Удмуртие» телерадиокомпанилэн сайтаз. Нош туннэ текст кылдытон бордын уж мынэ на.
 
«Туэ диктантмы экологилы сӥземын, — шуиз «Мынам Удмуртие» ТРК-лэн валтӥсь редакторезлэн воштӥсез Сергей Касаткин. – Туэ ар Россиын экологиен герӟамын. Текстлэн авторез луоз инкуазен, экологиен туж юн герӟаськем адями, профессор, Ижкалэн дано кунмуртэз Виктор Васильевич Туганаев».
 
Ужрадэ пыриськыны ручка но кагаз гинэ кулэ. Диктантэз гожтэм бӧрсьы ужез почта яке интернет пыр эскерыны келяно.
Азьвыл аръёсы сямен ик ужрадэз дасясьёс мукет улосъёсысь но озьы ик кунъёсысь ужъёсты витё. Йылпумъянъёс лэсьтэм бере «Бадӟым удмурт диктантэз» гожтэмъёс ужрадэ пыриськемзы сярысь нимысьтыз ужкагаз — сертификат басьтыны быгатозы.