«Бaдӟым Сибы ошмесъёс»: Бaдӟым Сибы гуртын вордскем писательёслэн творчествозы

25-тӥ оштолэзе 17.00 часэ Йӧскалык но шаертодон литературая но библиографияя центрын (Удмурт урам, 264-тӥ юрт) «Удмурт шаер» клуб тунсыко пумиськонэ ӧте. Со сӥземын Можга ёрос литературалэн нуналъёсызлы. Ужрадлэн темаез – «Бадӟым Сибы ошмесъёс»: Бадӟым Сибы гуртын вордскем писательёслэн творчествозы.

ХХ даурлэн кутсконаз Бадӟым Сибы гуртын улӥз но нылпиосты дышетӥз Вера Васильевна Толстая, ӟуч писательлэн Лев Толстойлэн ӵыжы-выжыез. Дворян семьяын вордӥськем мурт, со нылпиосты дышетон удысэз бырйиз но кыдёкысь удмурт гуртэ ужаны лыктӥз, ӟуч кылэз тодӥсьтэм удмурт крестьянъёс доры. В. В. Толстая ачиз дышетскиз удмурт кыллы, бадӟымъёсты но пичиосты грамоталы визьнодаз. Сибыын со 25 ар ӵоже улӥз. Солэн дышетскисьёсыз пӧлын – тодосчиос но дышетисьёс, кылбурчиос но артистъёс.

Сибыын вордскемын Удмурт Элькунысь искусство удысын трос азинскон басьтэм усточиос – Игнатий Гаврилович но Василий Гаврилович Гаврилов агай-вынъёс, Михаил Покчи-Петров, Анатолий Петров но Анатолий Григорьев. Ньылез улонзэ театрен герӟаз.

  • И. Г. Гавриловлэн «Вало ӧр куашетэ» пьесаеныз 1931-тӥ арын Удмурт театр ужзэ мытӥз.
  • Удмурт АССР-ысь сӥё-дано артист В. Г. Гаврилов тодмо луиз нылпи писатель сямен но (литературной ужен вырыны кутскиз 40-тӥ аръёс пумын).
  • Михаил Петрович Петров кылбурчи (кушем нимыз Покчи-Петров) Москваысь театральной институтын режиссерлы дышетскиз. Драмая но крезьгуръя удмурт театрын режиссер луыса ужаз. Со улонысь вазь кошкиз, кельтӥз кык кылбур бичет но кӧня ке спектакль пуктӥз. Калык яратӥз солэсь Г. Корепановен, Н. Шкляевен но Г. Корепанов-Камскиен  валче гожтэм кырӟанъёссэ.
  • Анатолий Петров журналист (М. М. Покчи-Петровлэн сузэрезлэн пиез) Удмуртиысь литературалэн историяз пыриз «Ашальчи» сонет тугокоеныз.
  • Анатолий Григорьев – туала нуналлы валтӥсь драматург, Удмурт Элькунысь Кивалтэтлэн литературая премиезлэн лауреатэз.

Пумиськон дыръя Бадӟым Сибы палъёс но дано гуртоосыз сярысь мадёз Бадӟым Сибыысь лулчеберет юртэн кивалтӥсь Елена Серафимовна Сергеева.

Сибы палъёсысь Удмурт театрысь артистъёс но драматуръёс сярысь аслэсьтыз тодэ ваёнъёссэ вералоз Анна Яковлевна Евсеева. Со трос аръёс ӵоже театрын литературной консультант луыса ужаз.

Ӝытэз шулдыртоз «Марӟан» фольклор ансамбль. Ужрадлы дасямын луоз «Большесибинские родники» книгаосын адӟытон.

http://unatlib.ru/udm/news/4101-badzym-siby-oshmesjos-bydzym-siby-gurtyn-vordskem-pisateljoslen-tvorchestvozy

 

Поделитесь с друзьями:

Журналист, редактор сайта, руководитель и куратор медийных проектов, продюсер и ведущий интернет-телеканала "Даур ТВ"

Дом Дружбы народов
Добавить комментарий