Азьланьтӥське Элькуновидение вожвылъяськонэ куриськонъёсты кутон

Элькуновидение конкурсэ туннэ нуналлы 10 пала куриськон вуиз ни.  Ваньмызлэсь азьло ик заявкаоссэс келязы Играысь кырӟасьёс. Куриськонъёс кутӥсько 30-тӥ куарусёнозь.

Ёросъёсын удмурт кырӟанъя Элькуновидение вожвылъяськонэ дасяськон уж пӧртэм сямен мынэ. Кылсярысь, Шаркан ёрос 11 пӧлысь устозэ быръёнъя тур радъялоз. Сыӵе ужрад ортчоз 28-тӥ куарусёнэ.

«Снова вместе» ансамбльысь артистъёс, нош соос 5 кузя, туннэ ёросын тодмамон ини. Группа конкурсъёсы пыриське, концертъёсы пота. Репертуаразы удмурт, ӟуч, бигер но украин кырӟанъес — ӵапак сыӵе выжыосысь  ансамбльысь артистъёс. Нош эшшо пӧлазы — пӧртэм удысын тыршисьёс. Соосты ваньзэсты огазеяз — крезьгур.

«Ми ум кышкаське учкись азе потыны, милемлы 2 ар гинэ ке но. — шуэ ВИА-лэн кивалтӥсез Ринат Минекаев. — Ми понна валтӥсез луэ соосын кусып тупатон. Концертмы удалтӥз ке, со – вормон. Кызьы шуо, артист понна кыкетӥ уждун — со кичабонъёс».

Нош кичабонъёс та воргоронъёслы мукет ласянь но. Соос выльысь улӟытӥзы ог 20 ар талэсь азьло куашкам «Новое время» ансамбльзэс. Ним гинэ мукет понӥзы — «Снова вместе». Нимыз ваньмыз сярысь вера ини.

http://www.myudm.ru/