Ашальчи Окилы сӥзем ужрад ортчиз Алнашысь лулчеберетъя юртын

Ашальчи Окилэн вордскемез дырысен 125 ар тырмонлы сӥзем сӥё-дано ужрад ортчиз Алнашысь лулчеберетъя юртын. Удмурт нылкышно кылбурчиез но врачез буре вайыны люкаськиз быдэс зал.

Ужрад улсын лулчеберетъя юртысь артистъёс А. Окилы сӥзем быдэс постановка пуктӥзы. Улон сюрессэ, творчествозэ туж быгатыса возьматӥзы. Нош ёросысь удмурт коллективъёс Окилэсь кылбуръёссэ лыдӟизы, солэн чуръёсызъя пӧрмытэм кырӟанъёсты быдэстӥзы.

Люкаськемъёсты ӟечкыласа вазиськизы элькунысьтымы лулчеберетъя министр Владимир Соловьёв, Алнаш ёрослэн кивалтӥсез Алексей Семёнов, Кун Кенешысь лулчеберетъя, туризмъя но йӧскалык политикая ялан ужась ӧрилэн кивалтӥсез, «Удмурт Кенеш» огазеяськонлэн Тӧроез Андрей Ураськин, «Удмурт дунне» газетлэн валтӥсь редакторез, «Удмурт нылкышно кенеш» огазеяськонлэн кивалтӥсез Елена Миннигараева.

Сяме пыремъя ини, та нуналэ ик Ашальчи Оки нимо ёрос премилэн лауреатъёсыз пусъемын вал. Туэ лауреат нимез басьтӥзы педагогика тодосъя кандидат, УдГУ-ысь доцент, элькунысьтымы калыкез дышетон удысысь дано ужась, Удмуртилэн кун премиезлэн лауреатэз Любовь Фёдорова но Асан совхоз-техникумысь дышетон удыслэн ветеранэз, шаерчи, 8 книгаослэн авторзы Лариса Шушкова.