Ашальчи Окилы Ижкарын синпелет пуктон но йӧскалык гимназиосты усьтон
Тӧрлыкъёслэсь но мер огазеяськонъёслэсь оглом 60-лэсь трос ӵектонъёс вуизы. Соос пӧлын: нырысетӥ удмурт нылкышно кылбурчилы Ашальчи Окилы Ижкарын синпелет (бюст) пуктон, солэн вордскемез дырысен вуоно арын 120 ар тырмоз; Можгаын но Глазкарын йӧскалык гимназиосты усьтон, котькуд ар «Гербер» огъяросси шулдыръяськонэз ортчытон, улосвыллэн шоркараз «Дом книги» литературая музей кылдытон; «Удмуртия — 100 лет» альбом кылдытон; элькунысь кун архивлэсь юртсэ выльдон ужъёсты йылпумъян.
Вань удмуртъёслэн «Удмурт Кенеш» огазеяськонзылэн тӧроез Татьяна Ишматова 2018-тӥ арын Удмуртъёслэн нырыстеӥ огъяросси ӧтчамзылы 100 ар но Кузебай Гердлы 120 ар тырмонлы сӥзем улосвылкуспо но калыккуспо конференциос, нош 2020-тӥ арын — Финн-угор калыкъёслэсь тямысэтӥ дунневыл конгрессэс ортчытыны ӵектӥз.
Удмуртиысь физкультурая, спортъя но егитъёсын ужан политикая министрлэсь ужзэ быдэсъясь Игорь Краснов тодэ вайытӥз, таяз арын «Шундыкар» лагерьлы 25 ар тырмиз шуыса. Со 2020-тӥ арын Удмуртиын финн-угор выжыысь усточи пиналъёс понна калыккуспо лагерь радъяны дэмлаз.
Бигеръёслэн мер огазеяськонъёссылэсь 2019-тӥ арын огъяросси Сабантуй ортчытыны, нош коньдон Татарстанэн валче вылысь висъяны ӵектон вуиз.
Удмуртилэн тӧроезлэсь ужзэ быдэсъясь Александр Бречалов пусйиз, али валтӥсь ужрадъёсты быръёно но нырысь ик пусъёно со ӵектосъёсты, кудъёсызлы федерациысь коньдон басьтыны луоз.
«Али та ужанрадлыклэн ӵектосэз гинэ, пӧртэм мер кылзонъёсын ми сое «кӧня ке куасьтомы». Ужрадэз немыз понна гинэ ӧвӧл ортчытоно, угось ваньмызлы кужым но коньдон уз тырмы. Милям ужпуммы — та ужрадъёс пыр, вамыш бӧрсьы вамыш, Удмуртия тодмамон мед луоз, тросгес адямиос мед адӟозы, маин узыр асьме элькунмы, — вераз Удмуртилэн тӧроезлэсь ужзэ огдырлы быдэсъясь Александр Бречалов».
Кенешонын озьы ик эскеризы элькун понна пусйымон луись объектъёсты выльдон но лэсьтон, синпель вузъёсты вӧлмытон но ивортодэт вӧлмытон ужпумъёсты.
Элькунлэн кунлыкезлы 100 ар тырмонэз пусъёнлы валтӥсь ӵектосъёсты азьвылгес веразы вал — Йӧскалык лыдӟетъюртэз выльдон, В. Г. Короленко нимо театрлэн азьвыл юртаз Удмурт лулчеберетъя центр кылдытон, Калашников проспектэз выльдон. Со сяна, Сарапулысь но Можгаысь педколледжъёслэсь юртъёссэс выльдон, Ленин ёросын «Удмуртилэн кунлыкезлы 100 ар» парк кылдытон, «Ижсталь» йӧ дворецез быдэсак тупатъян сярысь ӵектонъёс вуизы.