Ашальчи Окилэн тусыз кылдоз Ижысь одӥгез коркалэн борддораз

Та уж борды кемаласьгес ини туж мыло-кыдо басьтӥськиз «Удмурт нылкышно кенеш». Огазеяськонлэн ёзчиосызлы трос пӧртэм ӵектонъёсты эскероно луиз. Кылсярысь, кыӵе луыны кулэ Ашальчи Окилэн тусыз, марлы тужгес бадӟым саклык висъяно, кыӵе образ кылдытоно, со ваньмызлы валамон мед луоз шуыса

Вань дэмланъёсты лыдэ басьтыса, Ижысь тодмо суредась Денис Никонов кык эскиз суредаз. Одӥгаз Ашальчи Оки – сюрес дурын кызьпу вӧзын сылӥсь удмурт нылкышно, кылбурчи (ӵапак Окилэн нырысетӥ кылбур бичетэзлэн нимыз но «Сюрес дурын» нимаське). Мукет эскизын Ашальчи Окилэн кык пӧртэм дырыз возьматэмын: ненег нылкышно, кылбурчи но Быдӟым тыложе пыриськем эмчи.

Трос этажо юртэ пуксёз одӥг гинэ суред. Соин ик «Удмурт нылкышно кенеш» вазиськиське вань мыло-кыдоослы одӥгзэ эскизэз бырйыны. Озьы ик суред борды ватсан понна кылбур чуръёссэ ӵектыны дэмла на.

Юалляськон мыноз 16-тӥ оштолэзёзь. Ӵапак та нуналэ, Кун Кенешлэн пуктэмезъя, элькунамы кылбурчилэн вордӥськем нуналыз пусйиське.

Куарадэс сётыны, малпанъёстэс гожтыны быгатӥськоды татчы, «Удмурт Кенеш» огазеяськонлэн бамаз но, яке меӵак «Удмурт нылкышно кенеш» огазеяськонлэн Вконтакте вотэсэз пыр но «Удмурт дунне» редакцие 8 (3412) 73-33-42 номеръя жингыртыса.

Проект радъяське Кун Думаысь депутатлэн Лариса Бурановалэн кичӧлтэмезъя но Ижысь город Думалэн тӧроезлэн Фарит Губаевлэн дурбасьтэмезъя.