Ашальчи Окилэн тусбуез Ижкарысь юртлэн борддораз пуксёз
Дзержинский нимо ульчаын суредэз интыян бордын ужало ни. Солэсь эскиззэ быдэстӥз Денис Никонов, та суред понна социальной сетьёсын уно куара сётэмын вал.
Акилина Григорьевна Векшина кылбурчи сяна, эмчи луэменыз тодмо вал. Быдӟым ож вакытэ со уно ожгарчиосты йӧнатӥз, нош берло Алнаш калыкез трахомалэсь утиз. Суред Ашальчи Окилэсь кылбурчи но эмчи луэмзэ возьматоз.
Нырысетӥ удмурт нылкышно кылбурчилэсь портретсэ юртлэн борддоръёсаз интыяны Кун Думаысь депутат Лариса Буранова ӵектӥз. Проект улонэ пыӵаз «Удмурт нылкышно кенеш» огазеяськонлэн но Ижкар думалэн кивалтӥсезлэн Фарит Губаевлэн юрттэменызы.