«Ашальчи лыдӟонъёсты» ортчытон нуналэз юнматӥзы Удмуртиын

«Удмурт Кенеш» огазеяськонлэн кылкутӥсь секретарез Елена Александрова верамъя ужрадэ пыриськисьёс нырысь ик Ашальчи Окилэн вордскем гуртаз — Кузёбае — вуылозы но кылбурчилы йыбырттозы. Собере праздник Гракысь лулчеберет юртын азьланьтӥськоз. Отын Ашальчи Окилы сӥзем фильмъёсты возьматозы, солэн кылбуръёсыз но кырӟанъёсыз чузъяськозы. Со сяна, Гракын улӥсь мукет йӧслыкъёс калык эктонъёссэс эктозы но кырӟанъёссэс кырӟалозы, шуиз Елена Александрова.

«Сценарий дась. Чакламын Ашальчи Окилэсь кылбуръёссэ лыдӟыны, кырӟанъёссэ кырӟаны. Отын <…> трос йӧскалыко ёрос бере, малпаськом, пӧртэм эктонъёс, кырӟанъёс чузъяськозы шуыса залын, малы ке шуоно соос ӵош уло, валче уло», — «Удмурт Кенешлэн» секретарез вераз.

Озьы ик лыдӟонъёсын Ашальчи Оки нимо премилэсь лауреатъёссэ пусъёзы. Йӧскалык элькун премиен кык муртэ данъялозы, со сяна, Грак ёрос аслаз премиеныз куинь адямиез пусъёз. Кызьы шуиз «Удмурт Кенешлэн» кылкутӥсь секретарез, та нуналлы элькун данъетлэн лауреатъёсыз тодмо ӧвӧл на. Соосты туннэ, 14-тӥ южтолэзе, премиосъя ӧри быръёз, нош 15-тӥ южтолэзе со нимъёсты огазеяськонлэн исполкомез юнматыны кулэ.

Чакланъёсъя, «Ашальчи лыдӟонъёс» ог 300 пала пыриськисьёсты люкалоз. Удмуртиысь азьветлӥсьёс но пиналъёс сяна, ужрадэ Татарстанысь удмуртъёс но ӧтемын, шуиз Елена Александрова.

Тодэ вайытом, кылем арын «Ашальчи лыдӟонъёс» озьы ик кылбурчилэн вордскем нуналаз, 4-тӥ оштолэзе, Алнашын радъяськизы. Соку йӧскалык премиен пусйизы Якшур-Бӧдья ёросысь шаертодосчиез, дышетӥсез Валентина Ивановаез но Дэри ёросысь «Удмурт Кенешлэн» ёзэтэныз кивалтӥсез Лидия Бияноваез.

Ивортодэтъя «Удмуртия» агентстволэн сайтысьыз басьтэмын: https://udmurt.media/udm/news/obshchestvo/33373/