Армянъёслэн Вардавар праздниксы ортчоз Ижкарын 16-тӥ пӧсьтолэзе

Калыклэн сяме пырем праздникъёсыз пӧлын со тужгес бадӟымез гужем шулдыръяськон, одӥгез тужгес яратоноез. Тырлыклы, яратонлы но чылкытатӥськонлы сӥзем праздниклэсь нимзэ валэктонъёс туж трос. Одӥгзэ соос пӧлысь вераз Удмуртиын улӥсь армянъёслэн «Урарту» мер огазеяськонзылэн тӧроез Мнацакан Аракелян.

«Одӥгез история: узыр адями вуэз лушкам но сое калыклы дунтэк уг сёты вылэм. Но Вартан пияш шедиз, со мынӥз, вормиз но вуэз калыклы дунтэк сётӥз. Калык сое розаос куяса пумитаз. «Варт» — роза, «вар» — куяны», — валэктӥз мер огазеяськонлэн кивалтӥсез.

Вардаварлэн валтӥсь аспӧртэмлыкез — вань люкаськемъёс ог-огзы вылэ ву кисьтало. Возьмамтэ шорысь ву улэ шедем понна нокин ӝоже уг усьы. Вашкала дырысен лыдъяло вал, ву сьӧлыкъёсты гылтэ шуыса. Нош пиос понна та нуналэ асьсэлы кышно синйылтыны луонлык кылдэ вал. Азьвыл нылъёс паськыт дэремъёсын ветлӥзы, вылазы ву кисьтыса, пиос соослэсь мугорзэс адӟыны быгатӥзы. Озьы соос асьсэлы кышно бырйылӥзы.

Празднике лыктэмъёс понна ӵошатсконъёс но радъямын луозы. Мылкыд карисьёс пӧртэм спорт амалъёсын кужымзэс мертаны быгатозы: армрестлинг, волейбол, футбол, гира ӝутъян. Нош гозы кысканын вормисьлы така кузьмалозы.

Лыктэм калыкез ческыт сиёнъёсын утялтозы, нош сцена вылын самодеятельной коллективъёс быгатонлыкъёссэс возьматозы.

Радъясьёс пусъё, куазь урод луиз ке, праздникез мукет нуналлы выжтыны быгатозы. Нош 22-тӥ пӧсьтолэзе Вардаварез Можгаын пусйыны дасясько.