Анайёслэн бенефиссы

«Ужрад ортчиз бенефис амалэн, — ивортэ Сюмси ёросысь «Удмурт нылкышно кенешен» кивалтӥсь Раиса Волкова. — Нылкышноосты сӥлы карыса, соослэсь быгатонлыкъёссэс, «зарни» киё луэмзэс данъям».

Пумиськонэ ӧтемын вал Сюмси но Вавож ёросъёсысь анайёс – тужгес но йӧноосыз, адӟем карымоноосыз. Нош соос буш киосын ӧз лыктэ. Евдокия Ильиных возьматӥз конфет кагазлэсь вурем дӥськутсэ, Сюмсиысь Наталия Климова но Вавожысь Галина Краева лыдӟизы асьсэлэсь удмурт кылбуръёссэс, нош Вавожысь Юлия Софронова ваем ас киыныз быдэстэм суредъёссэ.

«Туж шумпотӥськом, таӵе ужась но дано удмурт анайёсмы вань шуыса, – азьланьтэ Раиса Михайловна. — Куноосмы сюанчиослэн яратон интыязы но вуылӥзы, ошмес дорын выжлёгетъёсты миськон йылолэн но Михаил Абашевлэн скульптураосыныз тодматскизы. Таӵе пумиськонъёсмес ёрос Нылкышно кенешъёс вискын ӵемгес радъялом, эшшо но золгес эшъяськом шуыса, кимес ик ог- огмылы сётылӥм!»