Анайлыклы сӥзем устоосыныз ӵектосъёсын тодматӥзы «Удмурт нылкышно кенешлэн» пумиськоназ Ижкарын
Туэ огазеяськонлэн ӵектосъёсыз анайлыклы сӥземын вал. «Анайлы сӥзьыса» йылпумъян ужрадэ Ижкарысь Калыкъёслэн эшъяськон юртазы элькунысьтымы «Удмурт нылкышно кенешлэн» ёрос ёзэтъёсыныз кивалтӥсьёс, азьветлӥсьёс но устоосыз удмурт анайёс люкаськизы.
Пумиськонын анайлы сӥзем 15 ӵектосъёс сярысь кенешизы, куиньзэ соос пӧлысь «Удмурт нылкышно кенешлэн» кивалтӥсез Надежда Степанова нимысьтыз пусйиз.
Со верамъя, Алнаш ёросын туж быгатыса но туж трос кужым поныса ортчытӥзы нуны веттан гурлы сӥзем «Изь, изь, нуные» вожвылъяськон. Со улсын пиналэз веттан выль кырӟанъёс кылдӥзы, азьланяз ужпум — соосты калык пӧлын вӧлмытон.
«Сыӵе аспӧртэм ужан амал семьяосын но, анай-атайёсын но. Тани вераз милям Валентина Михайловна Иванова («Удмурт нылкышно кенешлэн» Алнаш ёросысь ёзэтэныз кивалтӥсь — ред.), со огшоры кырӟан конкурс гинэ ӧз пӧрмы, со сыӵе кенешон, вераськон, анай-атайёсын но уж пӧрмиз, валэктыса, кудбыдӟа со интыез вылэм нуны веттан гуръёслэн», — шуиз Надежда Степанова.
Кыкетӥез устоез ужрад — «Меми дор сяська» интернет-ӵошатскон. Солэн авторез «Удмурт нылкышно кенешлэн» Ува ёросысь ёзэтэзлэн кивалтӥсез Валентина Яковлева ужбергатӥсь луэ но ӵектосъёсын ужаны яратэ.
«Мон ӵектосъёсын яратӥсько ужаны. «Начинающий фермер» ӵектосэн но мон грант басьтэмын. Та проект йылаз вуиз ни, шуом. Пукыны ум быгатӥське — ужаськом бере, ужаськом. Киын ужаськод бере, йыр но ужа», — Валентина Яковлева.
Надежда Степанова верамъя, «Меми дор сяськаос» конкурсэ пыриськисъёс понна куаразэс ог 6 сюрс адями сетӥз. Вожвылъяськонын вормисьёсты «Табань-клублэн» пумиськоназ шуркынмонэ пусйизы.
Эшшо одӥгез адӟем карымон ӵектос — со нылкышно огазеяськонлэн правлениезлэн ёзчиеныз Евгения Лекомцеваен малпам «Анай выжыкыл» ӵошатскон. «Удмурт нылкышно кенешлэн» кивалтӥсез малпамъя, та ужрад туж дыраз ортчытэмын вал.
«Ми ужаны кулэ ивортодэт вӧлметын, мерлыко вотэсын умой ужаны быгатыны кулэ шуыса, удмурт кылмес азинтыны. Соиз ласянь туж дырыз дыръя, анай кылъёслэн нуналзылы сӥзьыса, ми ортчытӥмы, радъямы «Анай выжыкыл» нимо ӵошатскон», — Надежда Степанова.
Анайлыклы сӥзем ар ёросъёсысь устооссэ удмурт анайёсты пусъемен йылпумъяськиз. Кайта но та ӧрын уж азьланьтӥськоз. Озьы ик вуоно арын иворъёс вӧлмытонэз но мерлыко вотэсъёсын ужез рос-прос пуктоно, дышетсконниосын кусыпъёсты юнматоно но соосын ӵош ӵектосъёс быдэстоно, пусйиз Надежда Степанова.
Тодэ вайытом, «Удмурт нылкышно кенешлэн» ёросъёсысь тросэз ёзэтъёсыз клубъёс радъяло. Кылсярысь, кылем покчиарняе, 14-тӥ толсуре, Сьӧлта ёросын «Тетера» клуб усьтӥськиз. Солэн нырысетӥ пумиськонэз нуны веттан гурлы сӥземын вал.
Источник ИА «Удмуртия»