Анай кылъёсты утён ужпумез ӝутӥзы Иворъёсты вӧлмытӥсь улосвыл но йӧскалык ёзэсъёслэн форумазы Казаньын

Люкаськемъёслы вазиськыса, Татарстанлэн кун советникез Минтимер Шаймиев иворъёсты вӧлмытӥсь улосвыл но йӧскалык ёзэсъёс кун политикалэн шораз луыны кулэ шуыса пусйиз.

Со ивортӥз, туннэ Татарстанын иворъёсты вӧлмытӥсь 963 ёзэсъёс пусъемын. Ӟуч кылын 280 газет но 205 журнал потэ, бигер кылын — 146 газет но 56 журнал. Со сяна, чуваш кылын но удмурт кылын газетъёс печатласько. Озьы ик со вераз элькунын мерлыко литератураез поттыны субсидиос висъясько шуыса, озьы гожъясьёслэн книгаоссэс дунтэк поттыны луонлыксы вань.

Форумын йӧскалык кылъёсты дышетонэн герӟаськем ужпумъёсты ӝутӥзы. Тодэ вайытом, Уйпал Кавказ федерал округысь егитъёслэн «Машук» форумазы вуылыкуз Россилэн азьмуртэз Владимир Путин жаляса вераз, арлы быдэ трос кылъёс но вераськетъёс быро шуыса. СССР дыръя кылъёсты утёнъя нимысьтыз программа ужаз, сое туала улонын улӟытыны умой луысал вылэм.

«Татын туж чакласькыса но одӥг кыл шедьтыса ужаны кулэ. Азьмурт котькуд югдур пумысен мылкыдзэ вераны турттэ, со кунысь азьмуртлэн кылъёс пумысен мылкыдыз. Катъя кема кенешонъёс мынӥзы, али нош ик усьтыр-табыр быдэстыны дыртӥсьёс шедёзы. Дышетонъя кун стандартъёсты Россилэн Кункатэзлэсь но улосвылъёслэн Кункатъёссылэсь яке уставъёссылэсь вылэ пуктыны уг яра. Стандартъёсын кунлэн кун кылызлэн, солэн калыкъёсызлэн кун кылъёссылэн тунсыкъёссы лыдэ басьтэмын ӧз ке луэ, со шонертэм политика. Лэсьтоно озьы, кызьы гожтэмын Росси Федерацилэн Кункатаз, кылъёсты утьыны юрттоно. Стандартъёс вань ёзъёсын соглаштэмын луыны кулэ», – шуиз Минтимер Шаймиев.

Анай кылъёсты дышетон, утён ужпум иворъёсты вӧлмытӥсь ёзэсъёс понна туж лэчыт луэ, вераз Татарстанысь Кун Кенешлэн тӧроезлэн воштӥсез, элькунысь Журналистъёслэн огазеяськонзылэн кивалтӥсез Римма Ратникова. Соин ик со Росси азьмуртлэсь кылъёсты утёнъя программаосты улӟытон сярысь верамзэ туж кема возьмам кылъёсын лыдъя.

«Со йӧскалык кылъёсын, Россиын улӥсь калыкъёслэн кылъёсынызы ужась иворъёсты вӧлмытӥсь ёзэсъёсты но утён ужпум: азинскозы-а соос, луозы-а, быгатомы-а асьмеос кадръёсты дасяны? 9-тӥ классозь анай кылзэс дышетэм адямиос тыршозы-а, шудом, бигер кылтодос удысын тодон-валанъёс басьтыны? Кытысь потозы гожъясьёс, анай кылэз рос-прос ӧм ке дышетэ, ӧм ке тодэ? Путин <…> туж кулэ, кема возьмам кылъёсты вераз: со программаосты выльысь улӟытыны кулэ», – шуиз Римма Ратникова.

Тодэ вайытом, удмурт кылэз дышетон ужпумъёс сярысь 21-тӥ гудырикошконэ Можга ёросысь Бадзым Уча черкогуртын удмурт кылъя но литературая дышетӥсьёслэн элькун форумзы вераськозы.

https://udmurt.media/udm/news/

Поделитесь с друзьями:

Журналист, редактор сайта, руководитель и куратор медийных проектов, продюсер и ведущий интернет-телеканала "Даур ТВ"

Дом Дружбы народов
Добавить комментарий