Анай кылэз азинтонъя ужпумъёс сярысь вераськизы Балезиноын
Анай кыллэн нуналэзлы сӥзьыса, 21-тӥ тулыспалэ школаосын пӧртэм ужрадъёс ортчозы.
«Котькуд поселениын, гуртын асьсэос малпалозы, кызьы сое радъяны. Нош татын ми вераським «Ойдо вераськом удмурт сямен» гожтэмен валентинкаос дасялом но ульчаын соосты сётъялом шуыса. Собере вераським администрацие, кабинетъёсы, кытын удмурт кылэз валало, сыӵеос кык-куинь гинэ луозы ке но, «Вераськиськом удмурт кылын» наклейкаос лякыны. Эмъюртэ но озьы карыны куромы. Собере ёзчимылэн Валентина Касимовалэн ӵектонэз вал автобусэ потыны, 11-тӥ маршрут шуиськом ми сое, каргуртъя со ветлэ. Анай кыллэн нуналаз гинэ со луоз», — шуиз ёросысь «Удмурт Кенеш» огазеяськонлэн ёзэтэныз кивалтӥсь Лидия Иванова.
Тулыспал шорын ёрос лыдӟиськонниен но Лулчеберетэз но калык творчествоез азинтонъя центрен ӵош удмурт кылын кылбуръёсъя ёрос конкурс ортчытыны чакламын. Со «Элькуновидение» элькун конкурслы дасяськыны нырысь вамыш луоз. Лулчеберетэз но калык творчествоез азинтонъя центрен ӵош удмурт кырӟанъя «Ёросовидение» конкурс радъялозы. Со вожвылъяськонъёслы йылпумъянъёсъя «Элькуновидение — 2017» конкурсэ пыриськыны кырӟан быръемын луоз.
Пумиськонын шуг-секытъёс сярысь но вераськизы. Кылсярысь, мер огазеяськонлэн правлениезлэн ёзчиосыз лыдъяло, ёрос тӧролэн Ришат Мухгалимовлэн «Балезино ёрос» муниципал кылдытэтысь дышетон юртъёсын удмурт кылэз дышетӥсьёсты дышетонэз умоятон амалъёс сярысь» 2016-тӥ арын оштолэзе юнматэм пуктэтэз умой уг быдэсъяськы шуыса.
Туннэ нуналлы удмуртъёс ёросын 52 процент пала лыдъясько. Лыдпус ӧжытэн кулэсме. Озьы ке но, Лидия Ивановалэн верамезъя, югдур, 90-тӥ аръёсын ӵошатыса, умойгес ик. Калык керпотытэк удмурт кылын куспаз вераське. Анай-атайёс но пиналъёссы удмурт кылэз мед дышетозы шуыса мылкыдзэс шараяло.
«Удмурт кылъя урокъёс нуисько. Но со урокъёсты кулэсто но кулэсто, собере факультативез, кружокез сямен нуэ шуо. Нош соку предметлэн сямен пуштросэз солэн быре», — сюлэмшугзэ вера Лидия Иванова. — «Удмурт Кенешлэн» ёзэтэз та ужпум бордын азьланяз но ужалоз, сое сэрттыны-пертчыны тыршоз».
Со сяна, кенешчиос ёросысьтызы музей экспонатъёсты утён сярысь но сюлмасько.
«Люкын милям туж узыр, ми лыдъяськом, музей уд шуы, сэрег-а мар-а, но сэреглы со туж бадӟым. Со экспонатъёс, гожъяса, музейлэн куронъёсызъя ик тыремын. Сое утён понна ми куриськом солы Балезиноысь шаертодонъя музеймылэн ёзэтэз инлык сётыны. Но сое куронъёслы тупась азе интыяны кулэ. Соос уго вуж интернатын, школаын уло, со интернат урод ини. Тупатъясалзы ке, улысал, дыр ай, но нокинлы, нокин уксё уг сёты. Соин ик ми куриськом инты солы», — вераз «Удмурт Кенеш» огазеяськонлэн ёзэтэныз кивалтӥсь.
Солэн верамезъя, отчы ёрос кивалтӥсьёс но потазы ини. Чутрак «ум лэсьтэ» ӧз шуэ. Соин ик осконзы вань, мар ке воштӥськоз шуыса.
«Удмурт Кенеш» огазеяськонлэн ёрос ёзэтысьтыз ёзчиос правлениенызы кварталлы быдэ одӥг пол пумиськылыны вераськизы.