Алнаш школаын 2 удмурт классъёс  усьтӥськозы

Пиналъёсты люкан-бичан понна ёросысь «Удмурт Кенеш»  огазеяськонлэн ёзэтысьтыз ёзчиос но асьсэос дышетӥсьёс анай-атайёсын валэктон уж нуизы, нылпи садъёсын пумиськонъёсы вуылӥзы. Палэнэ ӧз кыле ёрос кивалтӥсьёс но.

Удмурт кылэз школаосын дышетон ужпум анай-атайёс киын  — таӵе валэктон сёто Элькун кивалтӥсьёс анай кылэз дышетонъя юанъёслы. Одӥг ке но адями мылкыд кариз ке,  класс усьтӥськоз.

Алнашысь азьветлӥсьёс югдурез тупатон борды рос-прос басьтӥськизы. Анай-атайёсты ӝутканы кутскизы, кивалтӥсьёс доры юрттэт курыса вазиськизы. Озьы анай кылзэс дышетыны мылкыд карисьёс тросгес луизы.

«Милям котькуд ар одӥг удмурт класс усьтӥське, — шуэ  Алнаш школаысь дышетӥсь Наталья Орлова. – Нош туэ 7 нырысетӥ классъёс пӧлысь кыказ анай кылэз дышетозы. Со классъёсысь нылпиос удмурт кылэз, литератураез предмет чотын дышетозы».