Алина Чернова: «Вамыш» лагере котькуд пыриськись тодэ, малы со лыктӥз

Солэн кылъёсызъя, «Вамыш» туж шуныт ортчиз, ог-огенызы туж юн эшъяськизы вань люкаськемъёс: радъясьёс но, ӧнерчиос но, пиналъёс но.

«Сменае котькуд пыриськись тодэ вал, малы со лыктӥз, туж тыршыса уж борды кутскиз. Валтӥсь ужпум вожатой будэтон пуктэмын вал бере, адӟимы, кин пӧрмытоз но зэмос «Шунды» азьветлӥсь, удмурт вожатой луоз», — шуиз Алина Чернова.

«Шундылэн» кивалтӥсез ивортэмъя, сменае вуэм пиналъёслы тодон валан сётӥз психолог но режиссёр Лариса Ускова. Со трос пӧртэм тренингъёс, рольёсъя шудонъёс, вожатойлэн ужез сярысь лекциос ортчытъяз.

Со сяна, «Вамышын» эксперт луыса ужаз Удмуртиысь Калыкъёслэн эшъяськон юртысьтызы режиссёр Дмитрий Корепанов. Алина Чернова верамъя, со пыриськисьёсты финн-угор лулчеберетэн тодматӥз.

Озьы ик вуоно вожатойёсын егит удмурт азьветлӥсьёс Юлия Поздеева, Мария Дмитриева, Владимир Вахрушев но Влад Андреев пумиськылӥзы. Соос нылпиослы ужрад дасяны юрттӥзы.

Тодэ вайытом, «Вамыш» лагерез удмурт егитъёслэн «Шунды» огазеяськонзы радъя. Туэ со ог 10-тӥ пол ортчиз ни. Сменалэн валтӥсь ужпумез — «Шунды» огазеяськонзылы кивоштӥсьёсты будэтон.

https://udmurt.media/udm/news/obshchestvo/29874/