Александр Бречалов: ми вань мылкыд карисьёслы йӧскалык кылъёсты дышетыны луонлыкъёс кылдытыны кулэ
«Йӧскалык кылъёсты дышетон ласянь вань мылкыд карисьёслы огкадь луонлыкъёс кылдытыны кулэ. Но со одно ик дышетоно медаз луы — мылкыд каремъя. Ми йӧскалык кылэз вӧлмытыны но валамон карыны кулэ», — вераз Удмуртилэн тӧроез.
Александр Бречалов кылсярысь элькунлэн Москваысь постпредствояз удмурт кылъя курсъёс сярысь вераз но соослы кулэяськон вань шуыса пусйиз. Озьы ик солэн ивортэмезъя, улосвылысь школаосын али удмурт, бигер, пор но мукет кылъёсты дышето. Ватсаса тодон-валан сётон сӧзнэтэз учконо ке, элькун юрттэмен йӧскалык лулчеберетъя огазеяськонъёсын удмурт, бигер, армян, пор, азербайджан, немец, иврит кылъёсты дышетон курсъёс радъямын. Йӧскалык политикая министерстволэн заказтэмезъя но удмурт кылъя дунтэк курсъёс ортчытъясько.
Удмуртия Россиын нырысетӥез улосвыл, пусйиз элькунлэн тӧроез, кытын анай кылын кылтодонъя ӝӧквыл шудонъёсты поттон сӧзнэт радъямын. 2017-тӥ арысен удмурт кылъя онлайн-курсъёс ужало. Кылдытэмын, но ялан тырмытӥське «Удмурт Книга» электрон библиотека. «Билингва. Кыккылолыкъя удмурт центр» ӵектос каръёсын кык кылъем нылпиосты будэтон ужпумъёсъя анай-атайёслы семинаръёс ортчытъя. Иворъёсты вӧлмытӥсь ёзэсъёс удмурт но бигер кылъёсын ужало.
Росси азьмуртлэн грантъёсызъя фондысь утэм коньдон чотын 2018-тӥ арын «Шудком: дышетскиськом шудыса» ӵектос улонэ пыӵалоз.
Тодэ вайытом, 14-тӥ толсуре, Москваын Росси азьмуртэзлэн сяме пырем бадӟым пресс-конференциез ортчиз. Отчы Россиысь но кунгож сьӧрысь 1 640 журналистъёс люкаськизы. Соос Владимир Путинлы тужгес сюлмаськытӥсь юанъёссэс сётъяло. Йӧскалык кылъёсты дышетон ужпумез Татарстанысь журналистка ӝутӥз.