Александр Бречалов: чеберлыко киужъёсъя юртъёсын но центръёсын лэсьтэм арбериосты вузанэз паськытатоно

    Александр бречалов: чеберлыко киужъёсъя юртъёсын но центръёсын лэсьтэм арбериосты вузанэз паськытатоно 1

    «Ваньзэ, мар трос аръёс ӵоже лэсьтэмын Удмуртиын чеберлыко киужъёсъя центрын, ёрос центръёсын, лулчеберет юртъёсын, ми утьыны кулэ. Милям потэ но ми дась сое азинтыны. Утён понна сое вӧлмытыны кулэ», — шуиз Удмуртилэн тӧроез.

    Со дыре ик Александр Бречалов пусйиз, вуоно басьяськисьёслы тунсыко вузъёсты ӵектон понна, ужбергатонэз азинтэм сяна, йылолъёсты эскерон но утён понна тодосъя ужез но кужмоятыны кулэ. Озьы ик нимаз адямиосты та уже кысконо но выль ужан интыос кылдытоно.

    Чеберлыко киужъёсъя элькун центрлэн кивалтӥсез Юлия Железняк верамъя, али киужъёсъя вань центръёслэн но юртъёслэн луонлыкъёсынызы карта лэсьтӥське. Соя тужгес тунсыко но кулэ карымон вузъёсъя заказъёс кылдытӥськозы. Со Удмуртиез палэнын но тодмо карыны луонлык сётоз. Али Парадельфи шудонъёсы пыриськисьёс понна кузьымъёсын 1 сюрс 400 бичетъёс лэсьтыны курон вань ни.

    Тодэ вайытом, Юлия Железняк Чеберлыко киужъёсъя элькун центрен кивалтыны кутскиз 2017-тӥ арын толсуре.

    https://udmurt.media/udm/news/kultura-i-turizm/31706/