А.Оки нимо премиен пусъемын Лидия Биянова но Валентина Иванова
Ашальчи Оки нимо премиез сётон берло аръёсы ёросъёсын радъяське. Со улсын быдэс Элькунысь делегациос соиз яке таиз ёросын удмыртлыкез азинтонъя ужаменызы тодматскыны быгато.
Алнаш ёрос — Ашальчи Окилэн кыкетӥ дорез, шуыны луоз. Татын со трос аръёс чоже ужаз, татын ик ватэмын, татын солы сӥзем музей но ужа.
«Арысь аре трос кандидатураос вуо, — шуэ «Удмурт Кенеш» огазеяськонлэн тӧроез Татьяна Ишматова. — Со вера синйылтымон нылкышноосмы трос шуыса. Соин ик секыт бырйыны. Соин валче ик премилэн данэз но будэ. Куке тросэз пӧлысь бырйиськом тужгес но устооссэ, тужгес но быгатӥсьёссэ».
Ашальчи Оки нимо премилэн таиз ар понна лауреатъёсыз луизы «Удмурт кенеш» огазеяськонлэн Дэри ёросысь ёзэтэзлэн тӧроез Лидия Биянова но Якшур-Бӧдьялась шаерчи Валентина Иванова.
«Ашальчи лыдӟонъёс» радын Ашальчи Оки нимо Алнаш ёрос премилэсь лауреатъёссэ но сӥлы каризы. Ёросын та данъет 1994-тӥ арысен сётъяське ини.
«Асьмелэсь удмурт кылмес, удмуртлыкмес азинтэмзы но вӧлмытэмзы понна сётиськом та данъетэз, — шуэ «Удмурт Кенеш» огазеяськонлэн Алнаш ёросысь ёзэтэныз кивалтӥсь Галина Кутузова. — Ми чакласьком, кызьы аслаз уженыз ӵош кышномурт мер ужез но нуыны быгатэ».
Вуоно арын нырысетӥ удмурт нылкышно кылбурчи Ашальчи Оки вордскем дырысен 120 ар тырмоз. Соин ик, «Ашальчи лыдӟонъёсты» солэн вордскем палъёсаз — Грак ёросын ортчытыны чакламын.
www.myudm.ru/