ДаУРмес пусъёмы дэмен

Отчы пыриськизы Правительстволэн ёзчиосыз, Кун Кенешысь депутатъёс, мерлыко огазеяськонъёслэн азьветлисьёссы но мукет тодмо-дано адямиос.

Оргкомитет кылдытэмын вал ар талэсь азьло, та дыр ӵоже котькудӥз быгатӥз аслэсьтыз ӵектонъёссэ вераны. Удмуртиысь Правительстволэн Тӧроез Ярослав Семёнов ивортӥз: Удмуртилэсь дауръем юбилейзэ пусъён пумысен Россилэн Правительствоезлы кылем арын ивортэмын вал. Правительстволэн Тӧроезлэн воштӥсез Виталий Мутко асьме Тӧролы Александр Бречаловлы но Россиысь культурая министрлы Владимир Мединскийлы Удмуртилэсь 100 аръем юбилейзэ пусъёнъя поручение сётӥз.

Озьы оргкомитет ар ӵоже ужа ни, туэ 2-тӥ октябре кутэмын юбилеез ортчытон сярысь распоряжение, элькунысьтымы Коньдон ужпумъёсъя министерстволы косэмын 2019-тӥ-2010-тӥ аръёслы бюджетын талы коньдон чакланы. Планъя чаклам ужрадъёслы вуоно арын кулэ луоз 203908,3 сюрс манет.

Туннэ нуналлы Печатья но ивор вӧлмытонъя агентство дасяз кунлык басьтэммы дырысен 100 арез возьматонъя бадӟым медиаплан. Таӵе дыръя номырин воштонтэм луо архивъёс — соос калык син азе поттозы дауръем документъёсты. Ваньзэ сое адӟыны луоз газетъёсысь, ивор вӧлмытӥсь агентствоослэн сайтъёсысьтызы.

Али праздниклэсь пуссэ но огъя стильзэ кылдытон бордын уж мынэ. 23-тӥ ноябре Ижысь «Лифт» интыын сое шара эскерон радъяськоз.

100 аръем юбилеез пусйыны ужрадъёс чаклало: котькуд ёросын, предприятиын.

Бадӟым ужрадъёсты дасян но ортчытон оскемын Нациосын ужан политикая министерстволы. Планэн тодматӥз министр Лариса Буранова.

Быдӟым юбилейлы кутскон сётэмын луоз ни, ар ортчыса — кайта 4-тӥ ноябре Глазов городын. Кызьы тодӥськом, 1921-тӥ арозь та город луэ вал автономной областьмылэн шоркарез. Отысь Йо дворецын ортчоз «Удмуртия огазея» праздник, сое меӵак эфир пыр адӟыны быгатозы шаерысьтымы пӧртэм сэрегъёсын улӥсьёс.

Нош Выль ар праздникъёс дыръя Ижкарысь Шор площадьын усьтӥськозы аспӧртэм выставкаос — шаерысьтымы усточиос паймытозы асьсэлэн киужъёсынызы, бӧрысь скульптураос интыямын луозы шаерысьтымы паркъёсы. Шаерамы арлы быдэ ортчыло туж дано калыккуспо ужрадъёс: П.Чайковский нимо крезьгуро но Цирк искусствоосъя фестивальёс. Юбилей аре соосты уката яркыт но паськыт ортчытыны малпало: цирк потоз ураме но! Нош крезьгурез гажасьёслэн бадӟым малпанзы вань Иже люканы татын вордӥськем но дуннеысь бадӟым сценаос вылын кырзасьёсты, Австриысь Зальцбург музейысь огдырлы вайылыны П. Чайковскийлэсь скрипказэ но мукет. Со сяна, Брангуртэ асьсэлэн фестивалязы люкаськозы калык творчествоез яратӥсьёс.

Палэнэ уз кыле спортсменъёс но — соос понна лачак бадӟым ӵошатсконъёс малпамын: капчи атлетикая «Камлэн кутсконэз-100» марафон, отчы быдэс Россиысь бызьылӥсьёс пыриськозы, спортысь кышкыт (экстремальной) амалъёсъя, уянъя, ыбылӥськонъя ӵошатсконъёс но фестивальёс.

Валамон ини, паськыт радъяськыны кулэ удмурт ужрадъёс: вань удмуртъёслэн ӧтчамзы, Гербер, Бадӟым удмурт диктант… Праздник радъяны малпало сьӧрлон улӥсь удмуртъёс понна но — бускель улосъёсын улӥсь выжыосмы доры потаны. Кылчиос понна шумпотон — дасяське ӟуч-удмурт кыллюкам.

Валтӥсь ужрадъёс пӧлын — учреждениосты тупатъян , лэсьтон. Бадӟым планын пусъемын кык валтӥсь объект — Удмурт культурая центрез кылдытон но Национальной библиотекаез выльдон.

— Мыным туж кельшо 2019-тӥ арын тодмо конструкторлы Михаил Калашниковлы но 2020-тӥ арын Удмуртия кунлык басьтэм дырысен 100 ар тырмонлы сӥзем проектъёс — соос, туж ӟеч малпаса, ваньзэ лыдэ басьтыса, дасямын. Но мынам потэ вылэм, шулдыръяськонъёсын чош медаз вуны калыклэсь улонзэ ӟечомытон. Фейерверк огминутлы, нош со дыре кин ке эмъяське куагкась больницаын, кин ке ёрме нылпи садлы… Утялтоно городмес, трос калык шутэтсконо интыосты. Нош ужрадъёсы котькуд мылкыд карись пыриськыны мед быгатоз. Та быдэс Удмуртилэн праздникез! Шаерысьтымы котькуд адями мед шӧдоз сое.
Асьме понна та кык бадӟым юбилейёс туж дуно но дано луо, со туж ӟеч луонлык элькунмес данъяны, соин тросгес адямиосты тодматыны. Ӵуказе нунал сайкыт уз луы, ӧд ке гажа ортчемзэ, — шуиз Удмуртилэн Тӧроез Александр Бречалов.