9 сюрслэсь трос туспуктэмъёс вуизы «Мынам Удмуртие» фотоконкурсэ

«9 сюрслэсь трос туспуктэмъёс ыстӥзы Фотоконкурсэ. Трос любительской туспуктэмъёс, кудъёсыз пыр асьме лулчеберетлэн аспӧртэмлыкез усьтӥське. Учке ай, кыӵе асьмелэн чебер, бадӟым элькунмы. Оскисько, та вожвылъяськон арлы быдэ ортчытӥськоз шуыса», – вера Сергей Буторин, жюрилэн ёзчиез, М. Горький нимо гужем садлэн кивалтӥсез.

Кызьы шуэмын ивортонын, тужгес но трослыдъем луиз #МояУдмуртия номинация, татчы 799 адями туспуктэмъёссэ ыстӥз. #ГородаУдмуртии номинацие 344 уж вуиз, #УдмуртУлон — 255 уж, #УдмуртияЗаряжает — 170 уж, #СделаноВУдмуртии — 119 уж.

20–26 куартолэзе ужъёсты экспертъёслэн кенешсы дунъялоз. Отчы тямыс удысужлыко туспуктӥсьёс пыризы: Наиль Гильфанов, Амир Закиров, Тимур Ганиев, Андрей Широбоков, Николай Пономарёв, Кристина Короткова, Валерий Щербина, Ирина Волкова. Котькуд туспуктэмлы одӥгысен дасозь балл сётӥськоз.

Котькуд ӧръя 10 туспуктӥсьёс конкурслэн полуфиналаз потозы. Творчествоя нимысьтыз куронэз быдэстэм бере учкисьёс пӧлын куара сётон кутскоз. Тужгес но трос куара люкам уж «Учкисьёслэсь кузьымзэ» утоз.

Фотозаданилы йылпумъянъёсъя жюри но экспертъёслэн кенешсы котькуд номинациын быдэн одӥг вормисез быръёзы. Соослы цифровой техникая вузкароннилэсь 50 сюрслы сертификат сётозы. Нимысьтыз кузьым #МояУдмуртия номинациын вормисьёслы луоз. Соослэн туспуктэмъёссы Сарапулысь ческыт сиёнъёс поттӥсь фабриакалэн кампетъёсын коробкаосыз вылэ пуктозы. Нош #УдмуртияЗаряжает номинациын вормисьёс туспуктэмъёссэс конкурслэн партнёрезлэн цифровой техникая вузкаронниосысьтыз телевизоръёслэн но компьютеръёслэн экранъёсаз поттыны быгатозы.

Озьы ик вожвылъяськонэ пыриськисьёс понна туспуктонъя дунтэк мастер-классъёс радъяськозы.

Конкурслэн йылпумъян люкетэз 12-тӥ инвожое ортчоз. Собере быдэс толэзь ӵоже вормисьёслэн но призёръёслэн ужъёсынызы адӟытон ужалоз. Тужгес но устоосыз туспуктэмъёс 2019-тӥ арлы «Мынам Удмуртие» дырпусын печатламын луозы.

Тодэ вайытом, «Мынам Удмуртие» фотоконкурс 2018-тӥ арын оштолэзе кутскиз. Вожвылъяськонэз Ижкарысь М. Горький нимо гужем сад Удмуртиысь кивалтэт но Лулчеберетъя но туризмъя министерство юрттэмен ортчытэ.

https://udmurt.media/udm/news/obshchestvo/36580/

 

Поделитесь с друзьями:

Журналист, редактор сайта, руководитель и куратор медийных проектов, продюсер и ведущий интернет-телеканала "Даур ТВ"

Дом Дружбы народов
Добавить комментарий