9 группа усьтӥськоз удмурт кылъя дунтэк курсъёсын Ижкарын
Солэн кылъёсызъя, Удмуртилэн шоркараз сяна, удмурт кылъя тодон-валанъёсты элькунлэн мукет каръёсысьтыз но ёросъёсысьтыз мылкыд карисьёс басьтыны быгатозы.
«Камбарка, Сарапул, Якшур-Бӧдья, Эгра, Можга, Глазкарын кык группа, Вавожын но Гракын, усьтӥзы ке, эшшо Ува. Дас группа луоз», — вера Ангелина Решетникова, удмурт кылъя курсъёслэн кивалтӥсез.
Кивалтӥсь верамъя, кылем аръёсын ӵошатыса, туэ площадкаослэн лыдзы йылӥз. Дышетскисьёс пӧлын трос сыӵеосыз но, кин курсъёсы кылем аръёсы пыриськиз.
Пусйымон, удмурт кылъя курсъёсын мукет улосвылын но тунсыкъясько. Кылсярысь, дышетскон радъяны мылкыдзэс Казаньысь но Екатеринбургысь удмуртъёс веразы.
«Казаньысь вазиськизы вал адямиос. Собере Екатеринбургысь кыкетӥ арзэ ни шуо, ми пе турттӥськом (курсъёс радъяны — ред.) Соослы ми информационно юрттыны быгатӥськом», — шуэ Ангелина Решетникова.
Тодэ вайытом, кылем арын удмурт кылэз Ижкарын, Уваын, Сарапулын, Эграын но мукет ёросъёсын дышетӥзы. Курсъёслы коньдон Йӧскалык политикая элькун министерство висъя. Туннэ нуналлы удмурт кылэз дышетон пыр 3 сюрс пала адями ортчиз ни.
Туэ удмурт кылэз дышетыны мылкыд карисьёсты 20-тӥ куарусёнэ 18 часын Ижкарысь Калыкъёслэн эшъяськон юртазы нырысетӥ пумиськонэ витё. Куинь толэзь кыстӥськись курсъёс 1-тӥ коньывуонэ кутскозы.