85 шобрет шунтэ

Данак ужрадъёс пӧлысь одӥгез валтӥсез луиз «Удмуртия шунтэ» проектлы йылпумъянъёс лэсьтон. Нылпи садъёсын дышетскись пиналъёс та нуналлы вуризы 85 пумо шобретъёс. Котькудӥз сӥземын вал Россиысь кудӥзлы ке но улослы. Огезлэсь пӧртэм чебер мукетыз пӧрмиллям — ваньзэ соосты поттӥзы Шор площадьысь валтӥсь сцена вылэ. Ваньмыз 85 шобретъёс ик та нуналэ келямын вал странамылэн пӧртэм сэрегъёсысьтыз нылпи юртъёсы.

Ас калык дӥсьёсынызы пӧрмыса, Шор площаде лыктӥллям удмуртъёс, ӟучъёс, бигеръёс… Вуиллям анай-атайёс, песянай-песятайёс, егитъёс, пиналъёс… Эсьма, ваньзы мыло-кыдо пыриськизы пӧртэм шудонъёсы, вожвылъяськонъёсы. Кылсярысь, 100 чупрес, капчи мылкыдо песянай-песятайёс но сомында ик нунокъёссы эктыны быгатэмзэс возьматӥзы «Star&Млад» вожвылъяськонын. Нош бӧрысь соос борды флешмобе итӥськизы элькунысьтымы калык огазеяськонъёслэн ёзчиоссы. Соос возьматӥзы: ми огазьын, огъя мылкыдын!

Шулдыр кырӟанъёс, задор эктонъёс бер ӝытозь ӧз чусоме. Йылпумъяськизы соос шаерысьтымы тодмо кырӟась-эктӥсьёслэн концертэнызы. Городын улӥсьёслы но куноослы зэмос кузьым луиз Брангуртысь песянайёслэн сцена вылэ потэмзы! Соос борды итӥськизы тодмо кырӟась Светлана Ручкина, удмурт рэпер Богдан Анфиногенов, пичи лыдъем калыкъёслэн «Евровидениязы» пыриськем Иван Белослудцев, нылпиослэн «Новая волна-2017» калыккуспо конкурсазы вормисе потэм Арина Петрова но Москваысь нимысьтыз ӧтем куно — битбоксер (куаразэ вошъяса крезьгур кылдытӥсь) Вахтанг.

Та дыре ик Киров нимо паркын ортчиз элькунысьтымы фермеръёслэн «Асьмелэн» фестивальзы. Татын соос вузазы бакча емышъёссэс, йӧл сиёнъёссэс, чечызэс, пыжиськемъёссэс но трос мукетсэ.

Ярмаркаез усьтыса, горд лента интые, вакчи юдэсъёслы вандӥзы… каунэз. Фестивалез радъясьёс верамъя, каун — сӥзьыл адӟытон кадь ик яркыт но ческыт.

Гурт удысъя но сиён-юонъя министр Ольга Абрамова пусйиз, ярмаркае поттэмын вал сельхозпредпринимательёслэн тужгес синмаськымон вузъёссы. Удмуртия туннэ ассэ ческыт, ӟечлыко сюдыны быгатэ!