Эстониын ортчиз фин-угор егитъёслэн конференцизы (ИФУСКО-2018)

Оглом ужрадэ 190 адями пыриськиз, соос пӧлысь ог 20 удмуртъёс. 100-эз докладзэс лыдӟизы. Ужазы фольклористика, литература, культура, лингвистика, история, общество но ивор вӧлмытон, дышетон секциос.

Пусйымон вал удмурт егит тодосчилэсь Лариса Дмитриевалэсь наивной литература сярысь докладэз. Вераны луоз Эстониысь удмурт Сергей Сидоров виртуальной экспедициез сярысь. Виртуальной экспедиция — со Сергейлэн вордскем гуртэз сярысь вотэс бам. Отчы пыртэмын Татарстанысь Тэремшур гурт котырысь микротопонимъёс, вань семьяослэн кушем нимъёссы, гуртлэн историез.

Озьы ик секциос ужан вакытэ луэ вал учкыны фин-угор кылын киноос. Возьматэмын вал Удмуртиысь Денис Корниловлэсь «Анай» кинозэ, «Пузкар» фильмез, Ксения Ворончихиналэсь экспериментальной кинозэ, Сергей Сидоровлэсь удмурт мультфильмъёссэ но трос пӧртэм фин, пор, коми, эстон кылъёсын киноос. Со сяна, радъямын на вал лив, ижор, выру кылъёсъя но фин-угор комиксъёс суреданъя мастер-классъёс.

Конференциын студентъёс докладъёс гинэ уг кылзо, котькуд ӝыт соос понна шутэтскон радъяське. Нырысетӥ ӝытаз «Угри-мугри» концерт ортчиз, кудаз котькуд калык аслэсьтыз номерзэ возьматыны быгатӥз. Вань фин-угор калыкъёслэн пӧртэм кырӟанъёссы чузъяськизы, кин ке эктӥз но.