7 сюрслэсь ятыр адями пыриськиз Удмуртиын «Ночь кино» акцилэн ужрадъёсаз

Кинолы сӥзем арня элькунын 20-26 гудырикошконэ ортчиз. Нош 25-тӥ гудырикошконэ радъяськем «Кинолэн уез» акцилэн валтӥсь ужрадэз луиз.

Ужрадэ каръёсысь но гуртъёсысь лулчеберетъя юртъёс, паркъёс, музейёс но лыдӟетъюртъёс итӥськизы. 83 площадкаын возьматӥзы куинь росси фильмъёсты: Ким Дружининлэсь «Танки», Дмитрий Тюринлэсь «Рубеж» но Дмитрий Дьяченколэсь «Последний богатырь» ужъёссэс. Соосты учкисьёс 26 картина пӧлысь куара сётон пыр бырйизы.

Со сяна, пыриськисьёс понна мастер-классъёс, творчествоя пумиськонъёс, концертъёс, шудонъёс, флешмобъёс но мукет ужрадъёс дасямын вал. Кылсярысь, Ува ёросын «Танцевальный кино-хит» флешмоб, «Кино-крокодил» но «Кино-пазл» шудонъёс ортчизы. Балезиноос луолэсь анимация кылдытонъя «Живые картинки» мастер-класс но аквагрим радъязы.

Ижкарысь Пиналъёслэн но егитъёслэн элькун лыдӟетъюртазы «Кино лыдӟетъюртын кунояське» ужрадъёс ортчизы, отын пинал учкисьёс диафильмъёс учкизы, яратоно фильмъёсысь крезьгуръёсты шумпотыса тодылӥзы но ӵошен кырӟазы. Телеоператорен Владимир Шибановен пумиськонын оператор искусстволэн аспӧртэмлыкъёсыз сярысь но литературалэн но кинолэн герӟетсы сярысь кенешизы

Пиналъёслэн но егитъёслэн лыдӟиськонниязы сяна, ужрадъёс Удмуртилэн шоркарысьтыз Космонавтъёслэн парказы, Киров нимо паркысь фан-зонаын но Михаил Калашников нимо музейын ортчизы.

Тодэ вайытом, Кинолы сӥзем уй Россиын 2016-тӥ арысен ортче ни. Сое кунлэн Лулчеберетъя министерствоез но Кинолэн фондэз радъяло. Удмуртиын акцилэн радъясез — Лулчеберетъя но туризмъя элькун министерство но Калык творчествоя элькун юрт.

https://udmurt.media/udm/news/kultura-i-turizm/41020/

 

Контентмейкер, мемолог и журналист

Дом Дружбы народов
Добавить комментарий