Ижкарын Ашальчи Окилы сӥзем ӝыт ортчиз

Ӝытын трос шуныт кылъёсты веразы нырысетӥ удмурт нылкышно кылбурчи сярысь. Пумиськонэ люкаськизы пӧртэм аръёсы гожъям но гожъяськись кылбурчиос, пӧртэм арлыдо но пӧртэм быгатонлыкен кылбурась нылкышноос.

«Котькыӵе вакытэ соос мед гожъяськозы — 70-80-тӥ аръёсы-а, али-а, соос пушкын уло А.Окилэн малпанъёсыз, мылкыдъёсыз. Соин милям потӥз таӵе ужрад ортчытыны, кытын пӧртэм арлыдо кылбурчиос-нылкышноос лыдӟозы асьсэ кылбуръёссэс, ог-огзэс но мед кылзозы», — шуэ Удмуртиысь писательёслэн огазеяськонзылэн ёзчиез Елена Миннигараева.

Ашальчи Окилэсь кутскем ужзэ азиньтӥзы Людмила Кутянова, Татьяна Чернова, Алла Кузнецова, Галина Романова, Зинаида Рябинина, Мария Галеева… Кылымон куараоссы туала егит гожъясьёслэн но. Яратон, инкуазь, адямиослэн кусыпъёссы, дуннеын ас сюрестэ утчан — пӧртэм темаос борды басьтӥсько кылбурчиос.

Ватсаса: Ашальчи Окилэн юбилеезлы сӥзем ужрадъёс быдэс оштолэзьлы чакламын. Кылбурчилэсь творчествозэ яратӥсьёслы но гожъясьёслы тунсыко пумиськонъёс радъяськозы Ижкарын но ёросъёсын.

http://www.myudm.ru/