500 сюрс манет утӥзы удмурт гожъясьёслы Удмуртиын литературая лаборатори кылдытыны
Нылаш литературая «Кебит» лабораториен тодматӥз, со 14-35 аресъем удмурт гожъясьёслы чакламын. Пыриськисьёс вить ӧръёсъя дышетскозы: чеберлыко берыктон, кылбурет, драма, проза но критика. Мастер-классъёсы Удмуртиысь, озьы ик федерал драматургъёсты, берыктӥсьёсты, кылбурчиосты, книга потӥсьёсты ӧтьылыны малпало.
«Егит авторъёслэсь удмурт но ӟуч кылъёсын произведениосынызы бичет поттыны чакламын. Тиражлэсь ог люкетсэ элькунысь лыдӟиськонниослы но школаослы кузьмаломы. Бичетэз вӧлмытыны Удмуртиысь йӧскалык лыдӟетъюрт юрттоз», — вера Алина Крестьянинова, «Таврида Лит» вожвылъяськонын вормись.
Лулчеберет но искусство удысын ужась егитъёслэн «Таврида 5.0» форумзы 15 ӧръёсты огазеяз но 11-тӥ куартолэзьысен 5-тӥ коньывуонозь ортчиз. Отчы быдэс Россиысь 5 сюрс пала егитъёс пыриськизы.