50 адямилы коньдэт чотын дышетскон интыос висъямын 2017-тӥ арын УдГУ-ысь Удмурт кылосбуръя, финно-угроведениея но журналистикая институтлы 

Россиысь вылӥ дышетсконниосын куриськонъёсты кутон вакыт 20-тӥ инвожоысен 11-тӥ пӧсьтолэзёзь мыноз.

Удмурт кылосбуръя, финно-угроведениея но журналистикая институт куинь ӧръёсъя дышетскисьёсты кутоз — «филология», «педагогическое образование» но «журналистика».

«Филология» ӧрлы сётэмын 25 инты, – вера Наталья Кондратьева. – Со луоз «удмурт кыл но литература, ӟуч кыл но литература» ӧнерчиосты дасянлы одӥгез группа, мукетыз — «удмурт кыл но литература, финн кыл» ӧнерчиослы. «Педагогическое образование» ӧрлы ми кылем арысен «удмурт кыл но литература, англи кыл» направление сётӥмы, малы ке шуоно Удмуртиын, кызьы адӟыны луэ, тужгес но трос уг тырмо математикая дышетӥсьёс но англи кылъя дышетӥсьёс. «Педагогическое образование» ӧрлы 13 инты висъямын».

Та ӧръёсъя тодон-валаны басьтыны мылкыд карисьёс куинь экзамен сёто — обществознаниея но ӟуч кылъя (ЕГЭ), со сяна, удмурт кылъя. Удмурт кылосбуръя, финно-угроведениея но журналистикая институтлэн кивалтӥсез верамъя, «филология» но «педагогическое образование» ӧръёсын ватсаса баллъёс сёто «Тодосэ нырысетӥ вамышъёсы» («Мои первые шаги в науку») улосвылкуспо конкурсын вормисьёслы, озьы ик удмурт кылъя но литературая олимпиадаын вормисьёслы но школаез медален йылпумъясьёслы.

Ватсаломы, шоръёзо ӧнер дышетсконниосты йылпумъясьёс университетэ пырон понна кылем арын огъя кун экзамен сётыны кулэ вал ке, таяз арын соослэсь тодон-валанъёссэс эскерозы вылӥ дышетсконниын. Наталья Кондратьевалэн верамезъя, «та ласянь капчиямын кӧня ке луонлыксы».

«Журналистика» ӧрын коньдэт интыос туэ куиньлы кулэстэмын — 12 инты луоз. Татчы пырыны мылкыд карисьёс экзамен сёто литературая но ӟуч кылъя (ЕГЭ), озьы ик соослэн вань на творчествоя эскеронзы — пиналъёс эссе амалэн сочинение гожто, туала нуналлы лэчыт луись ужпумъёсъя асьсэлэсь мылкыдъёссэс усьто.

Со сяна, «журналистика» ӧръя пырисьёс утё на асьсэлэсь портфолиозэс. Отчы пыртыны луэ пӧртэм изданиосын печатлам ужъёссэс, озьы ик журналистикаен герӟаськем ужъёссы понна данъян грамотаоссэс.

«Таяз арын ар ӵоже озьы ик ужаз «Школа заочной журналистики», милям вал на нимысьтыз олимпиадамы журналистикая, та ужрадъёсын вормемъёслы озьы ик 10 балл ватсаса сётӥське экзаменъёслы. Со герӟаськемын соин — гуртысь пиналъёслы туж шуг вожвылъяськыны карын дышетскем пиналъёсын, соин ик кылем арын, жаляса верано луиськомы, журналистика ӧре удмурт пиналъёслэн баллъёссы ӧз тырмы. Оскиськомы, таӵе мытэм ужрадъёсмы юрттозы удмурт пиналъёслы но журналистика ӧре пырыны», — пусйиз Наталья Кондратьева.

Кылем арын вожвылъяськон вал одӥг интые куинь адями. Институтлэн кивалтӥсез чакламъя, таяз арын но со котырынгес ик луоз.

«Ми понна со туж умой но шуыны луоз, малы ке шуоно пиналъёс лыкто ни целенаправленно, кин мылкыд каре. Таяз арын но вазиськисьёс вал гинэ ни. Туж тунсыко абитуриентъёс лыкто Можга педучилищеысь, соос нимысьтыз дасясько ни милям институтамы. Озьы ик Кузебай Герд нимо гимназиысь мылкыд карисьёс лыктыны дасясько. Нимысьтыз лыкто «Школа заочной журналистики» йылпумъясьёс. Соин, мон шуысал, конкурс бадӟым луыны кулэ ӧвӧл, дыр, но со пиналъёс, кудъёсыз лыктозы милям институтамы, соос зэмзэ но муресь тодон-валанъёссэс возьматозы кадь», — вераз Наталья Кондратьева.

Удмурт кылосбуръя, финно-угроведениея но журналистикая институтэ гуртъёсысь пиналъёс лыкто. Соин ик улон инты пумысен но юанъёс кылдо. Наталья Кондратьевалэн верамезъя, университетлэн кивалтӥсьёсыз та ужпумез валало но лыдэ басьто.

«Шуг-секытъёс луыны быгатозы нырысетӥ кык арняосы, куке ми тыршиськомы ватсаса улон интыосты курыны, но кызьы возьматэ азьвыл практика, вань мылкыд карисьёслы улон инты ми шедьтыны тыршиськомы», — пусйиз институтлэн кивалтӥсез.

http://udmurt.media/udm/news/obrazovanie-i-nauka/20933/

 

Контентмейкер, мемолог и журналист

Дом Дружбы народов
Добавить комментарий