40 дышетӥсьёс «Арлэн дышетӥсез» ним басьтон понна вожвылъяськозы Удмуртиын

Конкурсэз сӥё-дано усьтон но вожвылъяськонлэн валтӥсь люкетъёсыз Ижкарысь 80 номеро школаын кутскозы.

Таяз арын тямыс ӧръёс чакламын:

  • дышетӥсь-мастер
  • визьнодась
  • нимысьтыз дышетонъя педагог
  • кутскись дышетӥсь
  • ӧнер дышетсконниысь педагог
  • вожатой
  • ватсаса тодон-валан сётонъя дышетӥсь
  • дышетонын азьветлӥсь.

Удмуртиысь арлэн дышетӥсезлэн нимыз тодмо луоз 23-тӥ южтолэзе вожвылъяськонэз сӥё-дано ворсан ужрадын, со Йӧскалык театрын ортчоз.

«Арлэн дышетӥсез» элькун вожвылъяськонэ пыриськон понна куриськонъёсты кутон толшоре кутскиз. Нырысетӥ люкетаз, кудӥз заочной амалэн ортчытӥське, 196 адями пыриськиз. Радъясьёслэн верамзыя, конкурсын асьсэды эскерыны мылкыд карисьёс арысь аре тросгес луо. 2016-тӥ арын, кылсярысь, соос 129 гинэ вал. Тужгес трос куриськонъёс пусъемын вал «Дышетӥсь-мастер» ӧрын.

Радъясьёс ивортэмъя, тужгес егитэзлы вожвылъяськонэ пыриськисьлы 22 арес, тужгес арлыдоезлы — 56.

Тодэ вайытом, кылем арын шуркынмонэ Ижкарын «Анай кылъя устоез дышетӥсь» вожвылъяськонлэн элькун люкетэз ортчиз. Тужгес трос люкам баллъёсъя вормисе Дэри ёросысь Лудорвай гуртысь Совето Союзлэн Героез А. М. Лушниковнимо школаысь удмурт кылъя но литературая дышетӥсь Надежда Мерзлякова потӥз.

Нош Сьӧлта ёросысь Выль Мӧнья шоръёзо школаысь удмурт кылъя но литературая дышетӥсь Светлана Хлебова «Анай кылъя, со пӧлын ӟуч кылъя, дышетӥсьёслэн огъяросси мастер-классы-2017» конкурслэн «Учитель-мастер» номинацияз устоез луиз. Вожвылъяськон Москваын кылем арын шуркынмонэ ортчиз, отчы быдэс кунысь анай кылъя 41 дышетӥсьёс пыриськизы.

Ивортодэтъя «Удмуртия» агентстволэн сайтысьыз басьтэмын: https://udmurt.media/udm/news/obrazovanie-i-nauka/33449/

Поделитесь с друзьями:

Журналист, редактор, контент-менеджер сайта, СММ специалист, оператор-постановщик интернет-телеканала "Даур ТВ"

Дом Дружбы народов
Добавить комментарий