40 пала адями люкаськиз удмурт кылъя дунтэк курсъёсы Ижкарын

Люкаськемъёс курсъёсы ветлыны мугъёссэс веразы. Удмурт кылъя курсъёслэн кивалтӥсьсы Ангелина Решетниковалэн кылъёсызъя, тросэз таӵе мугъёсты шараязы: мон Удмуртиын улӥсько, Удмуртиез яратӥсько, нош кылэз уг тодӥськы; анай-атае дышетӥллямтэ, соин мыным туж секыт улыны Удмуртиын; асьмелэн лулчеберетмы сыӵе тунсыко, али котыр дунне воштӥськиз, табере мынам удмурт кылэз тодэме потэ; Удмуртилэсь историзэ тодэме потэ; мон удмурт, ваньзэ уг валаськы, мынам потэ вераськеме, гожъяськыны но дышетскеме потэ; аслэсьтым кылме тодэме потэ.

Удмурт кылъя курсъёслы 72 час висъямын. Соос, группаын кенешемъя, арняяз кык пол яке куинь пол радъясько но куинь толэзь ӵоже кыстӥсько. Туэ удмурт кылэз сизьым интыын дышетыны луоз – ньыль интыын Ижкарын но быдэн одӥген Глазкарын, Можгаын но Вавожын.

Курсъёсы ветлӥсьёсын удмурт кылэз пӧртэм амалъёсын дышето. Ӝӧк сьӧрын пукыса ужам сяна, музейёсы потало, мастер-классъёсы пырисько, доразы кырӟась-эктӥсь, кибашлы куноосты ӧтчало. Кылсярысь, Кибашлыослэн юртазы перепеч пӧраны дышетскыны потало, адӟытонъёссэс учко, кар темаез ортчыкузы Генераллэн юртаз интыяськем Ижкарлэн музеяз ветло.

«Бурдъясько сыӵе интыын. Асьмелэн удмуртъёс сярысь вань сыӵе адӟытон, вань сыӵе музей, вань сыӵе инты, кытын удмуртъёслэн яратоно сиёнзы, куно пумитан сиёнзы, сыӵе данэ поттэмын, отчы адямиос уксё тырыса лыкто дышетскыны шуыса паймо», – шуэ Ангелина Решетникова.

https://udmurt.media/udm/news/obshchestvo/66497/ материалъя

Контентмейкер, мемолог и журналист

Дом Дружбы народов
Добавить комментарий