Ашальчи Окилэн юбилеез азьын кылбурчилэн но эмчилэн творчествоеныз тунсыкъяськисьёслы ӟеч кузьым дасязы Алнаш черкогуртысь музей-юртын ужасьёс: музей выль шедьтосъёсын узырмиз.
30 ар талэсь азьло Алнашын Акулина Векшиналэн улэм юртаз музей-мемориал усьтӥзы. Та дырозь тодмо кылбурчилэн но эмчилэн улэм-вылэмез но ужамез сярысь верась экспонатъёс трос люкамын. Туэ музей узырмиз выль тӥрлык-арбериосын. Одӥгез соос пӧлысь – сандык. Сое музейлы кузьмаз Ашальчи Окилэн ӵыжы-выжыез.
Мукетыз выль экспонат – ковер. Сое но музейлы кылем арын гинэ ас интыяз берыктӥзы. Мукет арбериосын ӵош та ковер но быгатэ Ашальчи Окилэсь улэм вакытсэ усьтыны.
«Туж тунсыко чакланы, кызьы 50-тӥ 60-тӥ аръёсы улӥз интеллигенция. Крестьян калыклэн сыӵе коверъёсыз ӧй вал, нош эмчилэн вылэм со вакытэ», – шуэ Алнашысь Ашальчи Окилэн музейысьтыз валтӥсь ӧнерчи Мария Петрова.
Эшшо тунсыко экспонат – 30-тӥ аръёсысь вуэм туспуктэм. Фото вылын Ашальчи Окилэн трахомотозной курсъёсаз ветлӥсь кышноос.
