25 пала кылъёсын тодматозы Ижкарын Кылъёсъя фестивальын

«Фестивальын 30-лэсь трос лекциос луозы, соос пӧлын 25 пала кылъёс. Куноос Мускоысь, Казаньысь но Чебоксарысь лыкто. Кылсярысь, Мускоысь лыктэ презентатормы, кудӥз вералоз эрзя кыл сярысь но латин кыл сярысь. Казаньысь лыктэ КФУ-ын (Казаньысь федерал университетын) ужась тодосчи, со хинди кылэз презентовать кароз но Чебоксарысь лыктэ япон кылъя презентатор», — вераз фестивалез одӥгез радъясь, Удмурт кылосбуръя, финно-угроведениея но журналистикая институтын дышетскись Анна Кадрова.

Фестивалез усьтон 11 часын кутскоз, лекциосы но кылъёсын тодматон урокъёс — 11 час 30 минутэ. Отчы котькуд мылкыд карись лыктыны быгатэ, пыронэз эркын.

«11 часын милям кутске пичияк концерт, пумиськон. Собере 11 час 30 минутэ кутскозы ни презентациос, соос 45 минут куспын ортчозы. Нырысетӥез луоз УдГУ-ысь тодосчи — мадьяр кыл сярысь вералоз. Собере мукетыз кутске 12 час 30 минутэ — араб, корей кылъёс но мукетъёсыз. Вить урокъёс ортчозы. Огдыре сизьым урок мыноз», — шуиз Анна Кадрова.

Кылъёсын тодматон радлыкен тодматскыны луоз фестивальлэн «ВКонтакте» вотэсысь группаяз.

Тодэ вайытом, берлоез Кылъёсъя фестиваль Ижкарын 2016-тӥ арын ортчиз. Соку 21 кылъёсын тодматӥзы.

Кылъёсъя фестивальёслы кутскон сётэмын вал 1995-тӥ арын. Соос ялан ортчытъясько Венесуэлаын, Словакиын, США-ын, Украинаын, Финляндиын, Франциын но Швециын. Россиын дуннеысь пӧртэм кылъёсын тодматон ужрадъёс радъяськыло Москваын, Волгоградын, Великий Новгородын, Ульяновскын, Санкт-Петербургын но мукет каръёсын. Ижкарын нырысетӥез фестиваль 2012-тӥ арын ортчиз.

Ньылетӥзэ Кылъёсъя фестивалез радъяло Удмурт кун университетысь Удмурт кылосбуръя, финно-угроведениея но журналистикая институтысь студентъёслэн тодосъя огазеяськонзы, «Удмуртлык» огинлык но УдГУ-ысь студентъёслэн калыккуспо клубзы.

https://udmurt.media/udm/news/kultura-i-turizm/35270/