22-тӥ шуркынмонэ «Удмурт Кенеш» огазеяськон 33 ар тырмонзэ пусъе

1991-тӥ арын удмуртъёслэн бадӟым кенешсы ортчиз. Солэн ужаз 500-лэсь трос делегат пыриськиз, 300-лэсь трос ӧтем куноос. Ӧтчамын учкемын вал удмурт калыклэсь лулчеберетсэ, асваланзэ но асшӧдонзэ утён но соосты вылӥе ӝутон пумысен трос юанъёс. Со эскерем ужпумъёсты улонэ пыӵатон вылысь кылдытыны ӵектэмын вал огазеяськон. Озьы вордӥськиз Вань удмуртъёслэн огазеяськемзы — «Удмурт Кенеш».

Та дыр куспын туж трос уж лэсьтэмын ини. Удмурт нылпиос понна Ижкарын Кузебай Герд нимо кун гимназия усьтэмын, озьы ик та ужлы кутскон сётэмын Можга но Глаз каръёсын, удмурт кылъя но литературая учебникъёс федерал лыдметэ пыртэмын, удмурт калыклэн азьветлӥсьёсыз арлы быдэ Трокай Борисов, Кузебай Герд, ашальчи Оки но Эрик Батуев нимо йӧскалык премиен пусйисько, удмурт кыллэн нуналэз кун праздникъёс пöлы пыртэмын, удмурт калыкез югдытӥсьёслэн, кунлыкез дурисьёслэн нимъёссы пыраклы вунэтонтэм каремын.

Улонэ пӧртэм ӵектосъёс но пыӵало: Кузебай Гердлы но Ашальчилы Окилы сӥзем лыдӟонъёс, Бадӟым удмурт диктант, нылкышно творчествоя «Чеберай» марафон, удмурт кырӟанъя улосвылкуспо «Элькуновидение» вожвылъяськон, кыккылолыкъя «Билингва» удмурт центр «Выль» но «Гербер» калык шулдыръяськонъёс но трос-трос мукетыз.

«Удмурт Кенеш» ас котыраз люказ но люка адямиосты, кудъёсызлэн сюлэмзы висе удмуртъёс понна, кудъёсыз мылысь-кыдысь тыршо удмурт кылэз, лулчеберетэз, сям-йылолъёсты утён но азинтон, егитъёс пöлы вöлмытон, калыклэсь асваланзэ ӝутон бордын.