21-тӥ тулыспалэ Ижкарысь Эшъяськон юртын «Кылтӥрлык» шудон ортчоз

Отчы пыриськыны ӧтё Удмуртиысь вань ивор вӧлмытӥсьёсты: Ижысь «Мынам Удмуртие» ТРК-ез, «Удмуртия» ГРТК-ез, «Вордскем кыл», «Кенеш», «Инвожо» журналъёсты, «Ӟечбур!» газетэз, ёрос газетъёсты, со сяна удмурт дышетӥсьёсты, Удмурт филологияя, финно-угроведениея но журналистикая институтысь тодосчиосты. Котькуд командаын быдэн 5-6 адями луыны кулэ.
 
Командаос эскерозы, макем ӟеч тодо удмурт кылэз, шонер гожъяськонэз. Нимысьтыз саклык висъяськоз иворчиослэн гожъяськемзылы. Кызьы удмурт кылын гожтыны официальной иворез, кыӵе правилоосъя удмурт кылын шонер гожъяськоно? Котькуд ивор волмытӥсь ёзлэн та юанъёслы аслаз валэктонэз. Асьсэ сямен та шоры учко тодосчиос но, удмурт кылъя дышетӥсьёс но.
 
Кылем арын шудӥзы Удмурт кылосбуръя, финно-угроведениея но журналистикая институтысь тодосчиос, «Мынам Удмуртие» ТРК-ысь, «Удмурт дунне» газетысь иворчиос, быдэсъязы шонер гожъяськонъя, кылысь кылэ берыктонъя ужъёсты. Соку вань командаос огкадь баллъёс люказы.