2020-тӥ арын Удмуртия кунлык басьтэмез дырысен 100 ар тырмонэз пусъёз

Соос пӧртэм удысъёсын герӟаськемын, вераз «Удмурт Кенешлэн» тӧроез Татьяна Ишматова улосвыл тӧролэсь ужзэ огдырлы быдэсъясь Александр Бречалов лулчеберетъя йӧскалык огазеяськонъёслэн азьветлӥсьёсынызы пумиськылыку 2-тӥ куартолэзе.

«Милям трос ӵектонъёсмы – вань йыръёс, кудъёсыз сое малпало, вань кин сое гожтэ, – шуэ ассоциацилэн тороез Татьяна Ишматова. – Юрттэт кулэ со ласянь — кулэ ни кинюртыны вань кулэ ужкагазъёсты но пусъёнлы дасяськон борды басьтӥськыны. Фестивальёс но праздникъёс гинэ медаз луэ, мед луозы ужрадъёс, кудъёсыз удмурт калыклы азинскыны луонлык сётозы, озьы ик татын улӥсь мукет калыкъёслы».

Солэн кылъёсызъя, Удмуртилэсь дауръем юбилейзэ пусъён элькунын улӥсь вань калыкъёс, но нырысь ик удмурт калык понна, туж яркыт ужрад луэ. Кунлык басьтэм дырысен 100 ар тырмонэз пусъён улсын ортчись ужрадъёс пыр улосвылмы, калыкмы сярысь быдэс Россиын улӥсьёс мед тодозы. «Удмурт Кенеш» дышетонэн, лулчеберетэн, иворъёсты вӧлмытӥсь ёзэсъёсын герӟаськем ӵектонъёссэ дасяз ни.

«Оскисько, соос улосвылысь мер но экономикаез азинтон радлыкын пусъемын луозы шуыса», — вераз «Удмурт Кенешлэн» тӧроез.

Удмуртиез Россиын но быдэс дуннеын тодмамон кароно шуыса пусйиз улосвыл тӧролэсь ужзэ быдэсъясь Александр Бречалов но. Солэн верамезъя, татчы лыктытозь со ачиз но, юрттӥсьёсыз но элькун сярысь туж ӧжыт тодо вал.

«Элькунэз ми одӥг ласянь тодӥськомы вал. Татчы вуэм бере паймимы, макем ваньмыз мукет сямен вылэм. Умой ласянь мукет. Асьмелэн Удмуртиын сомында умоез вань, сомында пӧртэм тунсыко ӵектосъёс, мон сюзэ но вераны быгато. Но вань одӥг ужпум — мон сямен, асьмеос ум быгатӥське соослы умой «упаковка» лэсьтыны, палэнэ вӧлмытыны», — вераз улосвыл кивалтӥсь.

Солэн кылъёсызъя, дуннее потонын валтӥсь инты басьтыны кулэ финн-угор калыкъёслэн форумзы. Со сяна, бадӟым луонлыкъёс сётэ «Гербер» удмурт йӧскалык праздникез Москваын ортчытон. Александр Бречалов верамъя, туэ праздник мукет сяменгес радъяськоз, со бордын али ужало ни. Чакланъёсъя, 2017-тӥ арын ужрад 1-тӥ пӧсьтолэзе. Озьы ик улосвыл кивалтӥсь вуоно арын Удмуртиын пельнянь кутонъя дуннелэсь чемпионатсэ одно ик радъяны ӵектӥз.

«Асьмелэн Чайковскийлэн фестивалез туж умой малпамын. Россиын ваньмыз тодыны кулэ: Чайковский — со Удмуртия, Удмуртия — со Чайковский. Асьмелэн озьы ӧвӧл. Юалляськон ортчытӥськом, кытысь потэмын АК-47. Тросэз сое герӟало Ижкарен, но Удмуртиен — ӧжытэз. Мыным шуо, тон Ижевской областе ужаны мынӥськод. Асьмеос ум быгатӥське вераны, соос сыӵе визьтэмесь шуыса. Со тужгес капчиез. Со мынам ужпуме — мон умой ӧй ужа, асьмеос тырмыт ӧм ужалэ. Соин ваньмыз, маин элькунмы данъяське, ми калыклы вуттыны кулэ», — вазиськиз йӧскалык огазеяськонъёслэн кивалтӥсьёссылы Александр Бречалов.

Озьы ик со 2017-тӥ, 2018-тӥ аръёслы чаклам вань ужрадъёсъя ужкагазъёсты солы сётыны куриз. «Асьмедыз Россиын но, дуннеын но возьматон понна мар лэсьтыны быгатом — юрттом. Солы кужыммы вань», — пусйиз Удмуртилэн тӧроезлэсь ужзэ огдырлы быдэсъясь.

http://udmurt.media/udm/news/obshchestvo/19320/

Контентмейкер, мемолог и журналист

Дом Дружбы народов
Добавить комментарий