2018-тӥ арын удмурт кылын тужгес кужмоез  чеберлыко литература ужлы конкурс 

Вожвылъяськонэ пыриськыны быгато Удмуртиын но солэн палэназ улӥсь удмурт кылын пӧртэм арлыдо гожъясьёс (писательёс но, лыдӟисьёс но).

Конкурс сизьым удысъёсъя (номинациосъя) радъяське, котькуд удысъя одӥг премия гинэ висъяське:

1. Тужгес умоез кузьмадёс, роман понна — 30 сюрс манет;
2. Тужгес умоез верос, новелла, чеберлыко очерк, эссе понна — 15 сюрс манет;
3. Тужгес умоез кылбур сузьет, поэма понна — 20 сюрс манет;
4. Тужгес умоез пьеса понна — 20 сюрс манет;
5. Пиналъёслы гожтэм тужгес умоез уж понна — 15 сюрс манет;
6. Чеберлыко литература ужез (ужъёсты) дунъясь яке литературатодосъя тужгес умоез гожтос понна — 15 сюрс манет;
7. Удмуртысь ӟуч кылэ берыктэм тужгес кужмоез уж (пӧртэм жанрен) — 20 сюрс манет.

Вожвылъяськонэ удмурт кылын гожтэм произведениос гинэ кутӥсько, мукет кылъёсысь берыктэм ужъёс лыдэ басьтэмын уз луэ. Конкурсэ ыстэм чеберлыко ужлэн темаез но быдӟалаез котькыӵе луыны быгато.

Дунъясьёс (жюри) нырысь ик авторъёслэсь туала ужпумъёсты чеберлыко, яркыт но аспӧртэмлыко возьматэмзэс, чеберлыко литература кылын гожтэмзэс лыдэ басьтозы.

Ужъёсты келяно «Кенеш» журналлэн редакцияз таӵе адресъя: Ижкар, Пастухов урам, 13-тӥ юрт яке электрон почтаяз Kenesh-udm@yandex.ru.

Вожвылъяськон 15-тӥ тулыспалысен 10-тӥ шуркынмонозь кыстӥськоз. Йылпумъянъёс 2019-тӥ арын толшоре (январе) лэсьтэмын луозы.

Конкурслэн куронъёсыз быдэсак печатламын «Кенеш» журналлэн туэ ар понна 2-тӥ номераз, Печатья но ивортодэтэз калыке вӧлмытонъя агентстволэн apmcur.ru но «Кенеш» журналлэн Kenesh.org сайтъёсазы.