16-тӥ оштолэзе Вотка кырын «П. И. Чайковскийлэн вордскем шаераз» 61-тӥ калыккуспо фестиваль усьтӥськоз
Фестивале быдэс дуннеысь тодмо крезьгурчиос лыктозы: Владимир Спиваковлэн кивалтэм улсаз «Виртуозы Москвы» камерной кун оркестр, Юрий Башметовалэн кивалтэм улсаз «Солисты Москвы» камерной оркестр, Тюменьысь филармонилэн оркестрез но мукетъёсыз.
ВАТСАН
Нырысетӥез фестиваль 6-тӥ куартолэзе 1958-тӥ арын ортчиз. Ӝыны даурлэсь кемагес ӵоже Вотка каре устоосыз крезьгуръя коллективъёс, ди-джейёс, крезьгурчиос люкаськыло. Россиысь одӥгез бадӟымез крезьгуръя ужрад кун юрттэмен ортче.
Котьку сямен ик, крезьгуръя бадӟым ужрадэ пыриськисьёсты аспӧртэм программа возьма. Туэ артист Даниил Спиваковский джазъя пианистэн Евгений Борецен фортепианоен концерт возьматоз. Нош Удмуртиысь кун симфони оркестр Казаньысь но Москваысь тодмо ди-джейёсын — DJGmorozov но DJ Feel — Чайковскийлэн балетъёсысьтыз крезьгурзэ электрон амалэн шудоз.
Фестивальлэн афишаяз, котьку сямен ик, филармониен радъям концертъёс, Удмуртиысь кун симфони оркестрлэн программаосыз, операя но балетъя театрлэн спектакльёсыз. Театр фестивальлы премьера дасяз — Николай Римский-Корсаковлэсь «Сказание о невидимом граде Китеже и деве Февронии» операзэ. Озьы ик ужрад улсын Россиысь лулчеберетъя тодмо менеджеръёслэн мастер-классъёссы но лекциоссы ортчозы.
5-тӥ куартолэзе Воткаысь лулчеберетъя «Юбилейный» юртлэн сцена вылаз Митрофан Пятницкий нимо ӟуч калык хор потоз. Концертэз бадӟым экранъёсын возьматозы. Нош 6-тӥ куартолэзе Пятницкийлэн хорез Ижкарысь учкисьёсты шумпоттоз.
Фестивалез сӥё-дано ворсан 7-тӥ куартолэзе Ӟуч драмтеатрын ортчоз. «BelBrand award» премилэн лауреатъёсыз Саян Исин (тенор, Казахстан), Чинара Ширин (меццо-сопрано, Италия), Джанмарио Страппати (туба, Италия) итальян операысь ариосты быдэстозы, озьы ик Пётр Ильич Чайковскийлэн крезьгуръёсыз чузъяськозы.
Тодэ вайытом, фестивальлэсь программазэ татысь учкыны луоз.