150 пар кут дасялозы Балезиноысь Чеберлыко киужъёсъя юртын «Нюлэсъя йӧскалык форумлы»

    150 пар кут дасялозы балезиноысь чеберлыко киужъёсъя юртын «нюлэсъя йӧскалык форумлы» 1

    Балезино ёросысь Чеберлыко киужъёсъя юртлэн кивалтӥсез Галина Першина верамъя кут кутаны курисьёс ялан лыкто ке но, таӵе быдӟалаен нырысьсэ вуиз. Соин ик синпель лэсьтон борды мукет ӧръёсъя ӧнерчиос но басьтӥськизы. Али кут кутанэн куинь адями выре: кыкез кызьпу туез сузяло, одӥгез — кута.

    «Татын росписья но ӧнерчи, калык шудонъя но, столяр но. Тани, шуом, туннэ кызьпу туйлэсь арбериосын адӟытон ке, милям вань ӧнерчиосмы пыриськыны быгато. Ваньзы туен ужаны быгато. <…> Али ми лыдъям, куд-ог нуналъёсы 18 пар, мукетъёсаз — 19 пар (кутаськом — ред.). Оскиськом, вуттом шуыса», — Галина Першина шуиз.

    Кивалтӥсь верамъя, туез соос кызьпу сурсву сётыку дасяло. Со азьын нюлэсчилэсь юало, кыӵе интыысь писпуосты ӵогыны чакламын. Матысь интыосын ӧжытгес туй шедьтоно, малы ке шуоно соосты пудо возьмасьёс но, огшоры улӥсьёс но бичало, валэктэ Галина Першина.

    Кутъёс сяна, Чеберлыко киужъёсъя юртын туйлэсь лянэсъёс, картузъёс, ибырвесъёс но кудыос лэсьто. Нош вань ужан ӧръёс сярысь верано ке, соослэн лыдзы 14-озь вуэ. Соос пӧлын куиськон, пужыятӥськон, калык шудон, калык дӥсь но мукет.

    Тодэ вайытом, «Нюлэсъя йӧскалык форум» Россиысь Кун Дума кичӧлтэмен радъяське. Со вить люкетэн ортчоз: Ижкарын кутскыса, Белокуриха, Тюмень, Хабаровск но Петрозаводск каръёсын азьланьтӥськоз. Отын нюлэсэз пайдаё кутон сярысь кенешозы, удысысь выль технологиосын тодматозы но улосвылъёслэсь ужан амалъёссэс эскерозы. Форум Москваын йылпумъяськоз.

    Ивортодэтъя «Удмуртия» агентстволэн сайтысьыз басьтэмын: https://udmurt.media/udm/news/kultura-i-turizm/33293/