15 кибашлыос люкаськизы Киясае пичи скульптураосъя ёроскуспо фестивале
«Мукет ёросъёсысь 10 пыриськисьёс но одӥгез Кияса ёросысь — кибашлыос, эшшо юрттӥсьёссы. Ваньмыз 15 адями луэ. Пырисько Пичи Пурга, Алнаш, Сьӧлта ёросъёс, Можга кар, Якшур-Бӧдья но Кияса ёрос», — вера Марина Митрошина, Кияса ёросысь Лулчеберетъя, егитъёсын ужанъя, спортъя но туризмъя управленилэн кивалтӥсез.
Солэн верамезъя, ёроскуспо фестивалез Киясаын куинетӥзэ ортчыто ни. Туэ со Спортъя XXVII элькун гужем гурт шудонъёслы дасяськон улсын радъяське но Кияса ёрослэн легендаосызлы но мифъёсызлы сӥземын.
Ньыль нунал ӵоже кибашлыос бадӟым коръёслэсь выжыкыл парк кылдытозы. Марина Митрошиналэн верамезъя, скульптураос интывылэз чебер карон вылысь гинэ уг кылдытӥсько, соос уже кутымон мед луозы.
«Конкурслэн одӥгез куронэз вал, со скульптураос «мед ужалозы» шуыса. Соос вӧзын беседкаос яке огшоры ӟусъёс мед луозы — оглом вераса, шуэтскон интыос. Нылписоын анайёс но, егитъёс но, вань мылкыд карисьёс но отын шутэтскозы», — пусйиз со.
Лэсьтэм скульптураосты, Киясае сяна, ёросысь мукет пусйымон интыосы пуктозы.
«Киясаын сяна, тодмо инкуазь синпелетмы — Сарали ошмес дорын но милям туризмъя центрмы —Уддядиысь Удмурт лулчеберетъя центр котырын», — вера Марина Митрошина.
Фестиваль улсын быдэстэм ужъёсты кык номинациосъя пусъёзы — Кияса ёрослэн легендаосыз но удмурт калыклэн выжыкылъёсыз. Лулчеберетъя управленилэн кивалтӥсез верамъя, котькуд номинациын вормисьёслы быдэн 10 сюрс манет сётозы. Озьы ик пичияк коньдон басьтозы ваньмыз пыриськисьёс. Со сяна, дунъясьёс нимысьтыз кузьым юнматыны быгатозы.
https://udmurt.media/udm/news/kultura-i-turizm/37172/