12-тӥ инвожое Ижкар Гербер ортчоз

Туэ кар шулдыръяськон Театрлэн  но Тазалыклэн арез  улсын но М. Т. Калашниковлы вордӥськем дырысеныз 100 ар тырмонлы сӥзьыса ортчоз.

Ужрадэ вуэмъёсты валтӥсь сцена вылын Ижкарысь  фольклор  ансамбльёс но мукет ӧтем коллективъёс шулдыртозы.  Кузебай Герд нимо гимназиысь нылпиослэн «Чебеляй» ансамбльзы, филармониысь «Италмас» но «Шулдыр ӝыт» ансамбльёс эктозы-кырӟалозы. Парке пырисьёсты «Арсенал-бэнд» духовой оркестр пумиталоз.

Герберез адӟыны вуэмъёс понна пӧртэм азбаръёс усьтӥськозы.  Котькуд мылкыд карись удмурт калык шудонъёсы пыриськыны быгатоз.