Ижкарысь Калыкъёслэн эшъяськон юртазы «Удмурт шыкысысь ваньбуръёс» бичетэн тодматскон ӝыт ортчиз

    Бичет удмурт но ӟуч кылын гожтэмын, лэсьтэмын А4 форматэн, 734 бамен, 800-лэсь трос туспуктэмъёсыз, кырӟанъёслы нотаос но гожтэмын, Зоутэн но Лекрут кырӟанъёс возьматэмын на транскрипциен. Таосаз тужгес но шӧдиське шошма диалектлэн пӧртэмлыкез. Книга борды ватсаса кык аудио но кык видео дискъёс понэмын.

    — Книгаез дасян понна трос дыр быдтэмын. Ёросысьтымы, Пор шаерысь, Киров улосысь удмурт гуртъёсы, архивъёсы ветлыса, материалъёс люкамын. Одӥгез жаль, книгаез бадӟым тиражен печатлан понна бадӟым коньдон кулэ. Кабинетъёс кузя кураськыса ветлыны, оло, капчигес луоз шуыса но туспуктэмъёслэсь ӟечлыксэс эскерон муген, поттэмын 10 бичет. Тау карисько, кин коньдонзэ, кин дырзэ жалятэк юрттӥз книгаме пумаз вуттыны! Нимысьтыз тау кылъёсме вераме потэ та вунонтэм ӝытэз ортчытыны юрттэмез понна «Удмурт Кенеш» огазеяськемлы! — шуэ бичетлэн авторез.

    Выль бичетэн тодматскыны но ӟечкылан кылъёссэс вераны люкаськиз быдэс зал. Тодосчиос, книгаез поттыны юрттӥськисьёс, удмуртлык ӧрысь азьветлӥсьёс, студентъёс, мылкыд карыса но гажаса лыктэм адямиос. Озьы ик пумиськонэ вуизы «Удмурт Кенешлэн» вице-президентэз Владимир Байметов, Татарстанысь Балтаси ёросысь Исполнительной комитетлэн кивалтӥсезлэн воштӥсез Ильгам Гайнутдинов но Татарстанысь удмуртъёслэн  лулчеберетъя йӧскалык автономизылэн быдэсъясь кивалтӥсез Марина Иванова.

    Ужрад зэмос фольклор праздниклы пӧрмиз. Люкаськемъёслэсь мылкыдзэс шулдыртӥзы шошма палась фольклор коллектив но калык кырӟанъя но эктонъя «Айкай» кун театр. Возьматэмын вал шошма удмуртъёслэн сюан радъёссы сярысь фильм. Йылпумъяськиз тодматскон ӝыт кырӟанъёсын но баян шудэм улсын шулдыр эктонъёсын, юмшанъёсын.

    https://vk.com/udmurtkenesh