«Будудмурт» ужрад ортчиз Татарстанын
Со выль проект. Пилотной амалэн со нырысетӥзэ улонэ пыӵатӥськиз ӵапак Покчи Лӧзя школаын. Чакламын со Татарстанын улӥсь 10-15 аресъем пиналъёс понна (нылпиос пӧртэм калыкысь луыны быгато). Валтӥсь курон – удмурт кылэн, лулчеберетэн, огъя вераса, удмуртлыкен тунсыкъяськон.
5 нунал ӵоже Покчи Лӧзя школаысь 6-тӥ классысь пиналъёс огъя удмурт калык, сям-йылолъёс сярысь тодон-валанъёс басьтӥзы, удмурт калык кырӟанъёсын, эктонъёсын, дизайнэн тодматскизы. Та дыр ӵоже басьтэм вань тодонъёссэс но быгатонлыкъёссэс пиналъёс возьматӥзы Покчи Лӧзя культура юртлэн сценаяз.
#будудмурт проектэн валче Татарстанысь удмурт егитъёслэн огазеяськонысьтызы нылъёс но пиос учкисьёслы асьсэ тыршемзылэсь емышсэ ӵектӥзы – удмурт калык мадьверосъя (легендая) «Толэзьлэн тусыз» шуыса нимаськись удмурт кылын мюзикл возьматӥзы.
Егитъёслэн асьсэды сценаын быгатыса воземзы, жингрес куараен кырӟамзы, чебер эктэмзы ваньзэсты синмаськытӥз.
Сцена вылын ӵош шудӥзы Кукмор, Мари-Турек, Балтач ёросъёсысь егитъёс.
Ортчем ужрадлэн аспӧртэмлыкъёсыз сярысь Татарстанысь удмуртъёслэн мерлыко огазеяськонзылэн исполнительной директорез Марина Иванова вераз: « Кыкез ик проектъёс (#будудмурт но «Толэзьлэн тусыз» мюзикл) – куинь ар ӵоже ужамлэн бервылзы».
Покчи Лӧзяе Марина Анатольевна буш киын лыктымтэ вал. Вылӥын верам проектъёсты улонэ пыӵатонэ но кылем арын «БиГерд» форумез ортчытонэ бадӟым люкет пыртэм адямиосты со Татарстанысь удмуртъёслэн НКА-зылэн Таукарон гожтэтъёсыныз шумпоттӥз.