10 гожъясьёс вормисе потӥзы удмурт кылын чеберлыко литература ужъёсъя вожвылъяськонын Удмуртиын
Тодэ вайытом, ужъёсты кутон 15-тӥ тулыспалэ кутскиз но 15-тӥ шуркынмонозь кыстӥськиз. Оглом 100 пала ужъёс вуизы.
«Жюри вань ужъёсты лыдӟиз, эскериз. Быръемын 10 ужъёс. Бадӟым прозаын вормисьёс кык мурт луизы, пичи прозаын (веросъёсын) — одӥг мурт, нылпиослы прозаын — ик кык мурт, кылбуръёсъя — кык мурт, драматургия — кык мурт но критика но литература тодос ужъёсъя — одӥг мурт», — вераз «Кенеш» журналлэн валтӥсь редакторез Ольга Бородина.
Вормисьёслэсь нимъёссэс толшоре шараялозы, соку соосты сӥё-дано пусъён ужрад ортчоз. Ольга Бородиналэн верамезъя, ваньмыз сямен тодмо нимъёс, плазы егитъёс но вань.
Толшоре «Кенеш» журналысь нырысетӥоссэ куинь ужъёсты лыдӟыны луоз. Выль арлэн нырысетӥ номераз поттозы бадӟым прозаез, нылпиослы гожтэм ужез но кылбуръёсын сузьетэз. Ар ӵоже мукетъёсыныз но ужъёсын тодматскыны луоз.
Ольга Бордоиналэн верамезъя, мылкыдзы вань, та вожвылъяськон арлы быдэ мед луоз вал шуыса, но кыӵе ке пумкылъянъёс али кутымтэ на.
Тодэ вайытом, вожвылъяськонэ вань мылкыд карисьёс пыриськыны быгатӥзы, арлыдзы но улон интызы лыдэ уг басьтӥськы. Устооссэ произведениосты куать ӧръёсъя бырйизы. Вормисьёс грамотаос но коньдонкузьым басьтозы.