1-тӥ толсур — вордскем нуналыз Удмурт кунлыкез одӥгез кылдытӥсьлэн — Трокай Борисовлэн

Трофим Кузьмич Борисов — удмурт калыклэн дано пиез, эмъясь, тодосчи, кивалтӥсь. Вордскиз 1891-тӥ арын туала Алнаш ёрослэн улосвылысьтыз Кизекгуртын.

Трос дышетскиз. Удмуртъёс пӧлын со нырысетӥез вылӥ тодон-валанэн, дипломен врач луиз. Удмурт но ӟуч кылъёс сяна, тодӥз француз, бигер, пор, калмык но коми кылъёсты.

Трокай Борисов трос кужымзэ сётӥз удмурт калыкез понна, соослэсь асваланзэс будэтӥз, улон шоры учконзэс воштӥз.

Солэн кивалтэмез улсын «Гудыри» (та вакытэ «Удмурт дунне») газетлэн нырысетӥ номерез потӥз. Газет бордын кылдытэм литературной кружок бадӟым инты басьтӥз Кузебай Гердлэн, Ашальчи Окилэн, Даниил Майоровлэн, Аркадий Клабуковлэн но мукет кылбурчиослэн творчествоязы.

Трокай Борисов ачиз но пӧртэм книгаослэн авторзы луэ. Со трос юрттӥз школаос усьтонын но. Аслаз уксёеныз басьтылӥз учебникъёс, тетрадьёс, карандашъёс, ручкаос, книгаос. Кылдытӥз Елабугаысь вотской учительской семинария (та вакытэ Можгаысь Т.К. Борисов нимо педагогической колледж).

Пыриськиз нырысетӥ дунневыл оже. Отысь берытскыса, мыло-кыдо тыршиз удмуртъёслэсь Нырысетӥ Всероссийской ӧтчамзэс дасянын. Собере трос ужаз шаермылы кунлык басьтон бордын.

1933-тӥ арын Трофим Борисов ӝегатэмын вал. Кыл кутон улэ кыскизы «СОФИН» ужъя. Пӧртэм интыосын пуконо луиз.

Чылкыт но ӟеч нимзэ Трокай Борисовлэсь берыктыны пӧрмиз 1988-тӥ арын гинэ. Нош 2012-тӥ арын, «Удмурт Кенеш» огазеяськонлэн кичӧлтэмезъя, Ижкарысь Коммунаръёслэн ульчаязы Трокай Борисовлы синпелет усьтӥзы. 2018-тӥ арысен кивалтон удысын удмурт калык понна трос лэсьтэм адямиослы Трокай Борисов нимо йӧскалык премия сётӥське. 2020-тӥ арын Трокай Борисовлэн вордскем нуналыз «Удмурт Элькунысь праздник нуналъёс но тодэ ваён дыръёс сярысь» катэн юнматэмын.