Удмурт лагерьёслэсь ужзэс мытӥз «Егит Тулкым»
Толон Можга ёросын усьтӥськиз «Егит Тулкым» лагерь. Туэ со 14-тӥзэ радъяське ни.
«Егит Тулкым» лагерез ортчытэ «Шунды» огазеяськонлэн Можга ёросысь ёзэз.
Лагере Можга но со котырысь ёросъёсысь егитъёс люкаськизы. Кӧня ке нунал ӵоже соос тодон-валан люкалозы театр, керамика, видеоискусство, звукорежиссура, фольклор, эктон, туспуктон но кырӟан удысъёсын.
Егитъёс бадӟым саклык висъяло удмурт калыклэсь лулчеберетсэ утёнлы. «Егит тулкымез» усьтонын вожатойёс гижысь-пиньысь дасям номеръёс возьматӥзы, нылпиос но ужрадэ мыло-кыдо пыриськизы: усто визиткаоссэс возьматӥзы.