Удмуртилэн ужрад туризмъя дырпусэныз тодматӥзы Ижкарын
Куноослы элькунамы ортчылӥсь тужгес тунсыко ужрадъёс сярысь веразы. Соос вить ӧръёсъя люкемын вал: адями но инкуазь, сиён-юон, лулчеберет, спорт но ужбергатон.
Адями но инкуазь ӧрын возьматӥзы: «Тол Бабаен тол юмшанъёс» (2018-тӥ арын толшоре), удмурт лулчеберетъя «Гербер» фестиваль (2018-тӥ арын пӧсьтолэзе), ӟуч лулчеберетъя «Высокий берег» фестиваль (2018-тӥ арын инвожое), «Русь дружинная» фестиваль (2018-тӥ арын пӧсьтолэзе), калык лулчеберетъя калыккуспо Брангурт фестиваль (2018-тӥ арын пӧсьтолэзе).
Сиён-юон ӧрын: «Пельняньлэн дунневыл нуналэз» (2018-тӥ арын 10-тӥ тулыспалэ), «Губи Fest» фестиваль (2018-тӥ арын гудырикошконэ), «Перевозинский засольник» калык шулдыръяськон (2018-тӥ арын пӧсьтолэзе).
Лулчеберет ӧрын: «Чайковскийлэн вордскем шаераз» ужрадъёс, крезьгуръя «Улетай» фестиваль (2018-тӥ арын пӧсьтолэзь), фантастикая Ижкар фестиваль (2018-тӥ арын куарусёнэ), «Осенины» элькун шулдыръяськон (2018-тӥ арын куарусёнэ), «Рыжий фестиваль» (2018-тӥ арын куарусёнэ).
Спорт ӧрын: куасэн бызьылонъя Галина Кулакова нимо марафон (2017-тӥ арын толсуре), биатлонъя «Ижевская винтовка» ӵошатсконъёс (2017-тӥ арын толсуре), спортэн тунсыкъяськисьёслэн нырысетӥосыз Огъяросси тол шудонъёссы (2018-тӥ арын южтолэзе), спортэн тунсыкъяськисьёслэн нырысетӥосыз Огъяросси гужем шудонъёссы (2018-тӥ арын инвожое).
Ужбергатон ӧрын: «Лэсьтэмын Удмуртиын» форум, Lada Ижевск заводын «день открытых дверей».
Тодэ вайытом, Удмуртилэн туризмъя дырпусаз Кияса ёрос доразы ортчылӥсь элькун фестивальёсты ӵектӥз, нош Глаз ёрослэн 6 ужрадъёсыз отчы шедизы.
Дырпусэ элькунысь муниципалитетъёсын ортчытъяськись оглом 100-лэсь трос ужрадъёс пыртэмын. Соосын afisha.udmurt.ru выль сайтын тодматскыны луэ. Со путешественникъёслы сяна, туроператоръёслы но, улосвылын ужрад ортчытыны малпасьёслы но тунсыко луоз. Нимысьтыз ватсэтлы луыса мылкыд карисьёс ужрадъёсты радъян пумысен куд-ог ужпумъёсъя тӧрлыкъёслэсь юрттэт басьтыны быгатозы.
Удмуртилэн тӧроез Александр Бречалов пусйиз, туроператоръёсын уж удысужлыко командаен кемалась нуиське ни шуыса, дырпусэн тодматон — элькунын туризмез азинтонлэн одӥгез люкетэз:
«Ми асьмелы чутрак ужпумъёс пуктӥськомы — Удмуртие лыктӥсь туристъёслэсь лыдзэс будэтон. Со та удысэз азинтыны но покчи ужбергатонэз азинтыны луонлык сётоз. Милемлы со туж кулэ».
Тодэ вайытом, улосвыл тӧролэн кичӧлтэмезъя, Удмуртилэсь ужрад туризмъя дырпуссэ кылдытыны гудырикошкон пумын кутскизы.