«Тулкым» смена ӧсъёссэ усьтоз 15-тӥ гудырикошконэ
Секыт югдуре шедем нылпиос понна радъяськись «Тулкым» смена ӧсъёссэ усьтоз 15-тӥ гудырикошконэ. Ортчоз со Ижкар котырысь «Ёлочка» лагерьын.
«Тулкым» егитъёс пӧлын удмурт кылэз но сям-йылолъёсты утён, азинтон понна радъяське. Вань ужрадъёс удмурт кылын ортчо, смена ӵоже пиналъёс вашкалаосымлэн улон-вылонэнызы тодматско.
Лагерь азьло сямен ик 10 нунал ӵоже кыстӥськоз, удмурт гуртъёсысь 40 пиналъёсты огазеялоз.
Туэ нырысьсэ пиналъёс удмурт мунёосты лэсьтыны дышетскозы. Визьнодалоз соосты Можга ёросысь «Катар» юртлэн анаез Валентина Берёзкина. Та инты огвакытэ луэ музей но, мастерской но, магазин но луэ.
– Озьы, пе, вашкалаослэн кырӟам-верамзы тусазы пуксе, нош мунёос – туалазэ вашкалаеныз ваче герӟась выж кадь луо, – шуэ Валентина.
Со сяна пиналъёс ужалозы «Фольклор», «Театр», «Вожатство» оръёсъя. «Тулкымын» пӧртэм удысъёсын асьсэдыз котыр ласянь возьматыны быгатэм удмурт азьветлӥсьёсын пумиськонъёс ортчылозы, егитъёс соосын кенешыса, асьсэлы выль-тодон валан люканы быгатозы.
Таяз радэ «Тулкым» лагерез радъяны юртто Егитъёсын ужан политикая агентство но «Росмолодёжь» агентствоен висъям грант.