Пу скульптурая кыкетӥез калыккуспо фестиваль усьтӥськиз Дэбесын

    Удмуртиысь, Мордовиысь, Беларусьысь, Даниысь пу вӧлӥсьёс, суредасьёс, скульпторъёс 5 нунал ӵоже пулэсь синпелетъёс лэсьтозы. Соос Шунды Мумылы (удмурт мифологилы), семьялы но нылпиослы, вашкала но туала йылолъёслы сӥземын луыны кулэ — ивортэ «Удмуртия» агенство. 

    Дась ужъёсты Дэбес черкогуртысь парке пуктозы.

    Черкогуртын улӥсьёс но куноос скульптураосты кылдытонэ пыриськыны быгатозы. Фестиваль дыръя Удмуртиысь пу вӧлӥсьёслэн но Мордовиысь Подлесной Тавлаысь лулчеберетъя нылпи школаын дышетскисьёслэн но дышетӥсьёслэн ужъёсынызы адӟытон ужалоз. Озьы ик «Куинь сюан гуръёс» элькун адӟытон-вожвылъяськон ортчоз.